Beijing, Naitung:
Katkum ki khubor, la ong ba ka China ha kane ka kynti, ka la thmu ban ai jingïarap pisa sha ki longïing bun khun kum ka jingpynshlur ïa ki shijur ha katei ka ri ba kin kha khun kloi ban pynroi ia ka jaitbynriew, namar la ong ba ka jinghiar ha ka jingbun briew, ka buh jingma ïa ka ïoh-ka kot jong ka ri.
La ong ba ka Sorkar China ka thmu ban ai ia ka pisa iarap kaba 3,600 Yuan ($503) shi snem na ka bynta iwei-pa-iawei khun ba la kha naduh ka 1 tarik u Kyllalyngkot mynta u snem haduh ban kynjoh 3 snem ka rta.
La don kumba shi snem tam ba ka China ka la pynduh noh ïa ka aiñ ban kha khun tang iwei bad kumta ruh la ong ba ka jingbun briew ha katei ka ri, ka la hiar haduh lai snem lynter haduh u snem 2024. Ka jingkha khun thymmai ha ka 9.54 million ha u snem ba la dep ki long tang shiteng na ki 18.8 million kiba la ioh ban buh jingkheiñ ha u snem 2016 ha kaba, ka China ka la weng noh ïa ka polisi kaba ailad ban don tang iwei i khun ha man ka longïing hapoh ka ri.
Ka jinghiar ka jingkha khun ka long ka jingeh ia ka ioh ka kot kaba ar ha ka pyrthei, ha kaba ka jingbun briew ha ka rta ban trei ka la nang hiar ha ka jingma ia ka jingdon kam bad ka jingmih. Ka China, kaba la duh ïa ka nam kum ka ri kaba bun briew tam sha ka India ha u snem 2023, ka lah ban ïohi ba ka jingbun briew jong ka, kan hiar shuh shuh sha ka 1.3 billion ha u snem 2050 bad hapoh 800 million ha u snem 2100, katkum ka jingkheiñ jingdiah jong ka UN.
Kata ka jingkhmih lynti ka mih na ka jinghiar kaba shyrkhei jong ka jingshongkha, kaba la poi sha ka kyrdan kaba rit tam ha kine ki shiteng spah snem bad ka lah ban wanrah ïa ka jingkha khun kaba kham duna shuh shuh.
Ka jinglong kaba pynsngewkhia ka la pynlong lypa ïa kiba bun ki sorkar pdeng ban pyntreikam ïa ki lad ki lynti, naduh ka jingai jingïarap pisa haduh ka jingai jingïarap ban shna ïing, ban ïarap ban pynduna ïa ka jingkit kaba khia ha ka liang ka pisa tyngka jong ki longïing bad ban pynshlur ïa ka jingkha khun.
Ki jingai jingiarap na ki jaka ha ki katto katne ki khep ki lah ban long kiba sngewrit shibun. Ka Hohhot, ka nongbah jong ka thaiñ jong ka Inner Mongolia, ka la paw ha ki khubor ha ka ri ha u Risaw, namar ka jingai jingïarap jong ka, kaba long 50,000 yuan, sha ki lok kiba don ïa u khun ba ar bad 100,000 yuan, na ka bynta uba lai lane palat.
