Rome, Naitung:
Katkum ki khubor, la ong ba ka la mih ka jingbthei kaba jur ha kawei na ki jaka theh umphniang kali ha Rome ha ka Sngi Thohdieng, ha kaba 30 tam ki briew ki la mynsaw ha katei ka jingjia bad 2 ngut pat ki mynsaw jur katta-katta.
Katei ka jingbthei ha katei ka sngi, ka la pynkhynñiuh ia kiba bun ki thaiñ marjan jong katei ka nongbah jong ka Italy.
Kane ka jingbthei ka la jia ha ka por kumba 8 baje jong ka step Sngi Thohdieng bad ka la sdang da kaba kem ding na ka jinglait ka lyer ha ka por ba dang theh umphniang.
U heh jong katei ka nongbah, u Gualtieri, u la leit mar-mar sha katei ka jaka theh umphniang kaba la ingkhong bad kylla dpei lut bad la ong ba ha ka por ba bthei, la iohi ia ka tdem rben kaba iong bha kaba kiew shalor suiñ bad kaba mih na katei ka jaka ha katei ka step, ha kaba ki paidbah nongshong shnong jong katei ka nongbah, ki la sheptieng bad khihwin lut namar ki pyrkhat ioh dei u bom aiu re uba la bthei bad uba la leit buh da mano re mano khamtam ha kum kine ki por ba la iohi tang da ki jing-iakynad kat sha ba phai.
Ki pulit ki la iathuh ba ha katei ka jingjia, 10 ngut ki pulit bad uwei u nongtrei jong ka tnat pynlip ding, ki la ia ngat bad mynsaw hapdeng ka jingiakhun jongki ban iarap ia kitei kiba don ha katei ka jaka.
