Shillong, Naiwieng 27
Ka Hynñiewtrep Integra-ted Territorial Organisa-tion (HITO) ha ka 27 tarik u Naiwieng 2024, ka la ïai bteng biang ban sam ïa ki kot lyngkdop ha kylleng ka nongbah Shillong kiba kynthup ha ki jaka ha Khyndailad, Ïewduh bad kumjuh sha kiwei-kiwei ki jaka kum sha ki thaiñ Sohra bad Sor Jowai.
Kum ban shu kdew hangne, ka Meghalaya State Electricity Regula-tory Commission (MSE RC) ha ka 24 tarik u Naiwieng 2024 ka la pynmih ïa ka hukum ha kaba ïadei bad ka jingpynkiew ïa ka bai thang bording ilektrik kaba la ktah shi kat dei eh ïa ki nongshong shnong ka Jylla na ka bynta u snem 2024-2025 kaba dei naduh ka 1 tarik u Ïaïong 2024. Kumta na ka liang ka HITO ka la dawa na ka Sorkar ba ka dei ban pynjari noh da ka Section 65 jong ka Indian Electricity Act, 2003 ka ban pynsting ïa ka bai thang bording na ka bynta ki paidbah kiba pyndonkam ha ki ïing ki sem.Katkum kane ka hukum baroh ki paidbah kiba pyndonkam ïa ka bording hapoh ka 200 unit, kin hap ban siew ïa ka bai bording ha ki 9 sien siew ka ban sdang naduh u bnai Nohprah 2024. Kane kan treikam tang na ka bynta kiba thang bording ha ki ïing ki sem bad ym na ka bynta kiba thang ha ki jaka pyntrei ne karkhana.
Na ka liang ka HITO ka la dawa ba ka Sorkar Jylla ka dei ban pynsangeh noh mardor ïa kane ka hukum kaba long ka jingban beiñ ïa ki paidbah bad pynrem jur ruh halor ka jingphah siew bai thang bording ilektrik biang jong ka Sorkar Jylla ïa ki paidbah naduh ka 1 tarik Ïaïong 2024.
Ka seng ka la ong ba kane ka rukom leh jong ka MSERC ka long kaei-kaei ka bym lah satia ban pdiang bad ong ba kum ka seng kan ïai ap haduh ka 30 tarik u Naiwieng 2024 ban ïoh pdiang ïa ka jubab na ka Sorkar bad kumjuh na ka tnat bording ka Sorkar Jylla halor kane ka bynta.
“Ngi la mih biang mynta ka sngi ban ïasam ïa kine ki kot lyngkdop sha ki paidbah khnang ba ngin ïoh ban pynsngewthuh sha ki paidbah halor kumno ba ka Sorkar ka la lute na kiba duk bad ban ai pat sha kiba riewspah”, ong ka seng. Ka seng ka la ong ruh ba ka por ka la dei ba kin pynsawa noh ïa ka sur bad pyrta ïa ka jingkylla bad ba ka Sorkar MDA ka dei ban shim ïa ka jingkitkhlieh halor kane ka jingban lyngkor ïa u paidbah bad bynrap da kaba ong ba lada ka Sorkar Jylla ka duna pisa, ka dei ban pynsangeh lut ïa ka jingthung ïa ki ‘Consultant’ ha ki tnat treikam bapher-bapher ki bym don jingmut satia hapoh Secretariat.
