Shillong, Naiwieng 27
Ki samla pule doktor kiba pule ha ka kyrdan Post-graduate (PG) hapoh ka North Eastern Institute of Ayurveda & Homeopathy (NEIAH) Medical College Mawdiangdiang, Shillong ki la mih shakhmat ban pynlong da ka jingïakhih shong shah thngan kaba khlem buh por.
Kane ka jingrai ban pynlong jingïakhih ka la long hadien ba ki la mad ïa ki jingeh ha kaba ïadei bad ka jingsahteng jong ka ‘stipend’ kaba la 10 bnai kynthih kaba la pynlong ruh ïa kiba bun ki samla pule ba kin shem shitom shi kat dei eh ban pynbit-pynbiang ïa ki jingdonkam kiba man la ka sngi. Kumta ha ka 27 tarik u Naiwieng 2024, ki la pynlong syndon da ka jingïakhih shong shah thngan kaba khlem buh por ha katei ka jaka pule.
Kum ban shu kdew hangne, kitei ki samla ki la sdang ban ud-nam halor kane ka jingbym ïoh ïa ka ‘stipened’ naduh ka 23 tarik u Nohprah 2023 bad ha ka 10 tarik u Nailur 2024 pat, ki la mih noh shakhmat ban pynlong da ka jingïakhih ha phyllaw jong katei jaka pule da kaba shong kyllaiñ mungor ha ryngkat ki jingthoh ha ki ‘placard’ na ka bynta ban dawa ban pynurlong ïa ka bhah bad ka bainong kaba ki dei ban ïoh lyngba ka ‘stipened’. Hynrei na ka liang ki bor pynïaid jong katei ka jaka pule ki la phah sangeh noh ïa kitei ki samla ba kin ïakhih bad ong ban aipor kumba ar bnai eiei ïa ka jaka pule khnang ba kan lah ban pynurlong ïa ki jingdawa jong ki. Wat hadien ka jingsangeh ka jingïakhih jong ki samla pule ruh katei ka jaka pule ka khlem shimkhia satia la ar bnai kynthih ban leh eiei halor kane ka bynta.
Na ka liang U Nongsaiñ Hima haba pyrshang ban ïakren bad kitei ki samla pule kiba la shong shah thngan ha katei ka jaka pule, ki la kyntait ban kren eiei bad ong ba na ka liang ki bor ba halor jong katei ka jaka pule ki la bthah ïa ki ba kim bit satia ban ai jingkren sha kino-kino ki lad pathai khubor hynrei ba ki lah tang ban shu shong ïakhih ha katei ka jaka. Katei ka jingïakhih jong ki samla pule doktor ka la sdang naduh ka step jong ka 26 tarik u Naiwieng 2024, ha kaba ka la ïaid kumba 24 kynta tam ba kitei ki samla pule doktor ki pynlong ïa ka jingshong shah thngan jong ki ha katei ka jaka.
Na ka liang kine ki samla PG, ki la kren da kaba shai ba lada ki bor ba dei peit jong ka NEIAH kim lah ban siew ïa ka ‘stipend’ jong ki, kum ki samla ki la rai ban ïai bteng ïa ka jingïakhih bad ba nym leit satia sha ki kam jong ki tad haduh ba ka jingdawa jong ki kan urlong.
Shuh-shuh la ong ruh ba wat hapdeng ki jingud-jingnam bad ki jingpynsngew na ki samla pule sha ki bor ba dei peit hynrei na ka liang ki nongpynïaid jong ka NEIAH ki khlem leh eiei ban shimkhia halor kane ka bynta bad ka jingpynslem ban pynïoh ïa ka ‘stipend’ ka la nang ïai jlan.
Ha ki ‘placard’ ba la rah da ki samla pule ha katei ka jingïakhih, ki la don ruh ki jingthoh kiba la thoh kumne, “Called Hero But Paid Zero” lane “La khot ïa ngi kum ki Hero hynrei la siew pat Zero”, “Cheating In Education Is A Crime”, lane “Ka jingleh thok ha ka pule-puthi ka dei ka kam runar”, bad “One Year of Silence One Year of Suffering”, lane “Kawei ka Snem La Sngap Jar Kawei ka Snem Ka Jingjynjar” nalor kiwei-kiwei ki jingthoh.
