Shillong, Naiwieng 27
Ka jingjyllei ki nongtuh ha sor Shillong ka la long haduh katta-katta haduh ba wat ïa ka kali jong uwei u nongthoh khubor uba la kham slem ha ka kam u Bah Martin Nongkhlaw ka la shah pynpait ki ïit kaba shadien katba u dang pynïeng hakhmat ka phyllaw jong ka Shillong Press Club (SPC) kaba don ha Lachumiere.
Kine ki runar kiba suba ba ki don ar ngut hadien ba ki la dep pynpait ïa ki ïit, ki la tuh ïa ar tylli ki Laptop bad saw tylli ki external hard drive kiba une u nongthoh khubor u ju treikam man ka sngi. Kane ka la jia ha ka por 9:20 mynmiet jong ka 26 tarik mynta u bnai Naiwieng 2024 hadien ba u la sei na phyllaw ka Shillong Press Club ban buh sha surok shwa ban dei artad ka por ba mut leit ph?i ïing noh.
Katkum ka CCTV ba la peit na kawei ka ophis kaba don marjan ka Shillong Press Club la ïohi ba kiba tuh ïa ki laptop na katei ka kali ki don ar ngut tangba ym shym la ithuh shuh ka durkhmat namar ba la miet.
Ban wad ïa kine ki runar, u Bah Martin u la leit ai da ka ejahar ha kajuh ka miet hakhmat ki pulit ka thanat Sadar.
Haba ïakren bad u Bah Martin u la ïathuh ba kawei ka laptop ka dei kaba dang shu thied thymmai, sa ar tylli ki pla ba ju kit hynrei kaba lyngngoh ba ki bynta shakhmat ki khlem ktah eiei namar ki la tuh kyrkieh tang na bynta shadien. U la ïathuh ba ki bynta ka surok kaba don ka Shillong Press Club ka long dum bad kham kynjah dei na kane ka daw ki runar ki kham ïoh kabu.
U Bah Martin u la kyntu ïa kino-kino lada don kiba wan die ïa ki laptop ki dei ban da kylli pyrthew bha bad peit bniah ïa ki briew khnang ban lap ïa kine ki runar.
