Shillong, Naiwieng 27
U Myntri Rangbah ka Jylla, Conrad K Sangma ha ka Sngi Balang u la ong ba ka wat ba-ar jong ka jingïakren pynbeit pud bad ka Assam kan sa sdang biang noh shen.
Haba ïakren bad ki lad pathai khubor, u Myntri Rangbah u la ong, “Ngi kyrmen ba ngin lah ban sdang biang ïa ka jingïakren bad ïakynduh noh shen hynrei ngan ym lah ban batai ïa phi ïa ka por ïa mynta tad haduh ba ngan da ïoh ïakren bad u Myntri Rangbah jong ka Assam”.
“Ngi la ïakren man ka por hynrei hapdeng kane, ka la wan noh ka ilekshon, ka ilekshon shiteng samoi bad kiwei kiwei ki kam, kumta ka la kham jynjar namar kine kiei-kiei ym namar jong kiwei pat ki daw,” u la ong.
“Mynta ngin sa ïapeit, ngin sa ïakren. Nga tharai kan don ka jingthaw ïa ka Sorkar Maharashtra, ka ilekshon ka dang shu kut ha Jharkhand bad kumta, kine ki jingeh ki la mih, kiba la pynslem bad pynsahteng ïa ka jingïakren,” la ong u Myntri Rangbah.
