Imphal, Nohprah:
Ha ka jingpynlong ïa ka jingkhynra, la ong ba la don kumba 8.6 akar ki lyngkha ba rep ïa u syntiew Poppy kiba dang phuh kiba la shah pynjot ha ka jaka khlaw Makuilongdi kaba hap hapoh ka jingkhmih jong ka jaka treikam ki pulit ka Senapati kaba don ha Manipur.
Ïa kane ka jingkhynra la ïalam da ka kynhun ba ïatreilang kaba kynthup ïa ka tnad ba dei khmih ïa ka khlaw ha Senapati, u Executive Magistrate, bad ki pulit ka Senapati, hapoh ka jingïalam jong u SDPO Senapati.
Kane ka sienjam ka long shi bynta jong ka jingpyrshang kaba dang ïaid shakhmat ban ïakhun pyrshah ïa ka jingrep be-aiñ ïa une u jait syntiew ba ju pyndonkam kum ki jingdih pynbuaid ha ka thaiñ.
U Myntri Rangbah jong ka Manipur u N. Biren Singh u la ïaroh ïa kane ka kynhun na ka bynta ka rukom treikam kaba shimkhia jong ki, da kaba pynpaw ïa ka jing-ktah kaba sniew jong kum kine ki kam ïa ka mariang bad ka shongsuk-shongsaiñ jong ka imlang-sahlang.
“Ki jingthung ïa ki syntiew poppy, kiba la lap ba ki dang don ha ka por ba sdang phuh, ki la shah pynjulor lut, bad la buh jingthoh ha kaba ïadei bad ka jingjia ha ka jaka treikam jong ki pulit ka Senapati na ka bynta ban pynlong ïa ka jingtohkit kaba bniah”, la thoh u Myntri Rangbah ha ka jingpynbna khubor lyngba ka rynsan X.
Naduh ba la sdang ïa ka jingïalap paidbah halor ka “War on Drugs” ha u snem 2018, ka sorkar Manipur ka la lah ban pynduh jait ïa ki jaka thung syntiew poppy beaiñ haduh 19,135.6 akar ha kylleng ki 12 tylli ki distrik. Kane ka jingïakhun kaba la sdang hadien shisnem ba u N. Biren Singh u la shimti ïa ka shuki, ka wad ban ïakhun ïa ki jingeh kiba ïadei bad u drok bad ka jingïadei jong ki bad ki jingïakynad jaitbynriew ha ka jylla, kynthup ïa ki jingsngewkhia halor ka jingrep syntiew poppy kaba la kynnoh ba don bynta bad ki nongwan buhai shnong na Myanmar.
Ha kajuh ka por, ka sorkar Manipur ka la pynkhuid 19,135.6 akar ki jaka rep poppy beaiñ ha kylleng ki 12 tylli ki distrik, katkum ka jingwad bniah kaba pyndonkam da ka Remote Sensing bad ka GIS Technology.
Ka jingwad bniah ba la pynlong da ka Manipur Remote Sensing Applications Centre hapoh ka tnad Planning da kaba pyndonkam ïa ki jingtip na ka tnat Narcotics and Affairs of Border Wing jong ki pulit ka jylla ka la pynpaw ïa ka jingkiew kaba khraw ha kaba ïakhun pyrshah ïa ka jingrep beaiñ.
Ka distrik Kangpokpi ka la mad ïa ka jingpynduh jait kaba jur tam, ha kaba la pynkhuid ïa ka jaka kaba 4,454.4 akar, bud sa ka Ukhrul kaba don 3,348 akar bad ka Churachandpur kaba don 2,713.8 akar.
Kiwei pat ki distrik kiba la shah ktah ki kynthup ïa ka Tengnoupal, kaba la duh 2,575 akar; Chandel kaba don 1,982.5 akar; bad ka Senapati kaba heh 1,682 akar.
