Patna, Nohprah:
Ka kynhun NDA kaba bat ïa ka jingsynshar ha Bihar ha ka sngi Thohdieng ka la kyntait ïa ki jingkynnoh ba ka kynhun synrop ka lah ban pyrkhat biang halor ka jingpynkhreh ïa u Myntri Rangbah ka jylla u Nitish Kumar kum u nongïalam jong ka ha ka ilekshon sha Assembly ka ban long ha u snem ban wan kata ha u 2025.
Haba kren ha ki lad pathai khubor hadien ka jingïalang kaba la long hangne ban wanrah ïa ka jingïatreilang kaba kham bha ha ki kyrdan ba hapoh, ki President jong ki seng ha ka jylla kum ka BJP, ka JD(U) jong u Nitish Kumar bad ka Lok Janshakti Party (Ram Vilas) jong u Myntri ka sorkar kmie u Chirag Paswan ruh ki la pynjah burom ïa ki jingai jingmut ba la ai da u Myntri ka tnat ki kam pohïing jong ka sorkar kmie u Amit Shah.
U Dilip Jaiswal, Myntri ka jylla bad u heh nongïalam jong ka BJP ha Bihar, u la ong, “Ngi dei ban sngewthuh ba u Amit Shah u pyrshang ban pynpaw ba u dei u ‘karyakarta’ (nongbud) jong ka seng ha kaba ïa ki rai kiba halor la shim da ka Parliamentary Board”.
“Hynrei, ka kam nongïalam jong u Myntri Rangbah ka jylla u Nitish Kumar ka la long kaba la ai la slem bha. Ym don jingkylli ban leit phai biang sha kata,” la pynskhem u Jaiswal.
Une u nongïalam u la jubab halor ka jingïakren dang shen jong u Amit Shah bad kawei ka lad pathai khubor ha kaba la kylli ïa u, hato ka NDA ka lah ne em ban leit thep vote ha Bihar khlem da pynbna ïa u kyrtong Myntri Rangbah kumba ka la leh dang shen da ka jingjop kaba khraw ha Maharashtra?
U Amit Shah, u President barim jong ka BJP uba dang shah kheiñ kum u nongpynïaid ba kongsan jong ka seng, u la jubab hadien ba la sangeh, “Ngin sa shong lang bad ai ïa ka rai. Ngin sa pyntip ïa phi hadien ba ngi la shim ïa ka rai.” Ka jingkynthoh kaba na sha lyndet ka la wanrah ïa ka jingkynnoh kaba shyrkhei ba ka BJP ka lah ban pyrshang ban ym pynpaw pyrthei ïa u Nitish Kumar, uba la ïalam ïa ka kynhun NDA jong ka Bihar la jan ar phew snem, ha ka ilekshon Assembly jong u snem 2025.
Ïa kane ka jingsngew jong u Jaiswal la pynpaw ruh da u Raju Tiwari, President ka seng LJP (RV) ha ka jylla, uba la ong, “Kam don jingartatien ba ka kynhun NDA kan ïakhun ha ka ilekshon Assembly ka ban long hapoh ka jingïalam jong u Nitish Kumar. Lada ki la don kino-kino ki jingsngew artatien, u President ka BJP u la kren ïa kine da ka jingkren kaba shai jong u.”
U President ka JD(U) ka jylla, Umesh Singh Kushwaha, u la paw ba u sngewkmen halor katei ka jingkyrshan ïa u nongïalam jong u.
U la ong da ka jing-kmen “‘To pynlong nongpynïaid ïa u Nitish’ (da u Nitish biang ha u snem 2025). Kane ka dei ka jingsngew jong baroh ki para ba ïatreilang jong ngi”.
“Ka JD(U) kam shym la khuslai satia shaphang ka jinglong nongïalam, kaba dei ka jingkylli kaba la pynbeit bha ha Bihar. Ngi pynleit jingmut ha ka jingïatreilang kaba kham bha, ym tang ha ki jylla, hynrei ha ki kyrdan distrik bad ki jaka thep vote,” u la bynrap.
