Guwahati, Kyllalyngkot:
Ka jylla Assam ka la thmu ban pyllait ïa ka Mobile App kum shi bynta ban ailad ha ka ban ïoh jingtip ïa ki surok kiba sniew ha ka jylla. Ïa kane ka jingpyllait paidbah ïa kane ka Mobile Application ka ban sa wan la pynbna da u Myntri Rangbah ka jylla u Himanta Biswa Sarma ka ban ïarap ban weng ïa ki jingeh jong ka jingsniew ki surok ha kane ka jylla.
Ïa kane la pyntip paidbah da u Myntri Rangbah hi ha ka Facebook Live Session ha kaba u la kdew ba ki paidbah mynta kin lah ban pyntip ïa ka jingsniew jong ka surok beit beit sha ka tnad Public Works Department (PWD) da ka jingïarap jong ka Mobile Application. Kane ka jingthmu kan pynsuk ïa ki lad ki lynti kiba stet ban shim khnang ban maramot ïa ki surok kiba don ha ka jinglong kaba sniew.
Na ka bynta ban sdang, ïa kane ka Mobile Application la buh ban pyllait ha ki san tylli ki nongbah jong ka Assam, kata, Guwahati, Tezpur, Jorhat, Dibrugarh bad Silchar. Ïa kane ka Mobile Application la buh ban pyllait paidbah ha u bnai Ïaïong lane Lber mynta u snem.
