Jowai, K’lyngkot 14
Ka lympung ïalehkai Thadlaskeiñ Football League ba la pynïaid da ka Thadlaskeiñ Sports Association (TSA) ka la nangjam shaphrang ha kaba ka Malngiang ka la jop da ka walk-over hadien ba ka Nongkharai SC kam shym la lah ban wan mih sha madan ha ka Sngi Ba-ar ha Wahïajer Stadium.
Ha ka jingïalehkai kaba bud, ka Morathud ka la pynliem noh ïa ka Takhniang da 2-0 kol. Kane ka la wan urlong lyngba ki kol ba la thep da u Daunibiang Lyngdoh ha ka minit kaba 35 bad kawei pat da u Sooki Laloo (65).
Haba phai sha kawei pat ka jingïalehkai, ka Sohphoh SC ka la pynliem ïa ka Tympang SC da 3-0 kol. Kane ka nam jop ka la wan urlong lyngba u Habandajop Khynriam uba la thep tang mar ïasdang ka jingïalehkai ha ka minit kaba 8, kumjuh u Phran Shylla (19) bad ïa kawei pat la ïarap pynthep da uwei na ki rangïalehkai ka Tympang.
Ka jingïalehkai ha ka Sngi Balang kan long hapdeng ka Kdohkule pyrshah ïa ka Mukhla Sohshrieh ha ka por 10 baje mynstep, kumjuh ka Ïawthymbleiñ pyrshah ïa ka Wahshnangiar SC ha ka por 12 baje mynsngi bad ka Nongthymme Nongdhar ïa ka Youngstar Namdong ha ka por 2 baje nohphai sngi.
