Imphal, Kyllalyngkot:
Ki lehnoh, ki la shah kynnoh ba ki la bteng ban leh ïa ki kam pyntriem da kaba pynhap ïa ar tylli ki bom na ki Drone ha phyllaw jong ka jaka treikam jong ki shipai ka 5 Manipur Rifles kaba hap hapoh ka jingkhmih jong ki pulit ka Lamsang ha Imphal West distrik ha ka miet jong ka sngi Ba-ar.
Kumba la ïathuh ki heh pulit, ha ka sngi Balang, la ong ba ka Drone kaba la kit ïa ki tiar pynbthei ka la pynhap ïa uwei na kine ki ar tylli ki bom hajan ka 5 MR Camp ha ka por 9:30 mynmiet ha ka Sngi Ba-ar..
Haba kane ka Drone ka la pynhap ïa u bom, u la hap hajan kawei ka jaka ba la tih, bad u la bthei hangne, la ong u heh ba dei khmih jong ka MR camp ha kaba la ong ba ka la dei ha ka por 9:30 mynmiet bad uwei pat u bom ïa uba la pynhap shwa u la bthei ha ka jingkieng ha Langeibung, hajan ka jaka treikam jong ki shipai ïada ri ha ka por 9:28 mynmiet. Ym shym la don mano mano ruh ban ïap ne mynsaw na kine ki jingshah thombor.
Ki pulit jong ka Imphal West District bad ki pulit ka Lamsang bran bran ki la leit sha kitei ki jaka ba la jia ka jingjia. Hynrei ki Drone ba la pyndonkam ki la her noh na katei ka jaka.
