Lucknow, Kyllalyngkot:
Kumba la sakhi, la ong ba shisngi hadien ba 30 ngut ki briew ki la ïap bad 60 ngut kiwei pat ki la mynsaw ha ka jingïaïuh para briew kaba la jia ha shwa ka jingmih jong ka sngi ha ka sngi Balang ha Sangam jong ka Maha Kumbh ha Prayagraj jong ka Uttar Pradesh, ka sorkar jylla ka la wanrah ïa ki lad ki lynti kiba tyngeh ban ïada na kum kine ki jingjia nangne shakhmat.
Ki bor sorkar ki la pyntreikam ïa san tylli ki jingkylla kiba kongsan, kynthup ïa ka jingpynbna ïa ka jaka baroh kawei ba don kane ka jingïalum paidbah kum ka jaka bym dei ban don kali.
Kane ka jingjia ba sngewsih, ka la jia ha ka sngi Balang, ha ka por ba da ki Million ngut ki nong-leit ïaid riewblei, ki dang pyrshang ban tur ban leit ngam um na ka bynta ka jinglehniam ba kyntang ha ka Mauni Amavasya, kawei na ki sngi ba kyrpang tam jong ka Kumbh Mela.
Katkum ka jingïathuh jong u Deputy Inspector General (DIG) jong ka Maha Kumbh, u Vaibhav Krishna u la ong ba kane ka jingkhynra ka dei na ka daw jong ki nongleit ïaid riewblei kiba la tur pyrshah ïa ki jingker ba la ker ha katei ka jaka ha kaba kane ka la wanrah haduh u pud jong ka jingthyng-ngiañ ban poi sha ka jaka ngam ha ka um khuid.
Kum shi bynta ban nang pynkhlaiñ shuh shuh ïa ki jingpyntreikam ban tehlakam ïa ki paidbah, la bthah ïa ki ophisar IAS u Ashish Goyal bad u Bhanu Goswami ba kin poi mar-mar sha Prayagraj. Baroh ar ngut kine ki heh sorkar ki la don ha ka bynta kaba kongsan ha ka por ba ki la pynïaid beit bad wanrah jingjop ha ka jingdon jong ka Ardh Kumbh jong u 2019 ryngkat bad u Vijay Kiran.
Ha kane ka jingïalang, u Bhanu Goswami u la shakri kum u District Magistrate bad u Vice Chairman jong ka bor synshar Kumbh Mela, katba u Ashish Goyal u la long u Commissioner jong ka Allahabad, uba peit ïa ka jingpynïaid.
Nalor kata, la buh ïa san ngut ki ophisar ba kyrpang kiba don ha ka kyrdan Secretary kiba la don lypa ka jingshemphang ha kaba pynïaid ïa ki kam ba ïadei bad ka Maha Kumbh.
Hadien kane ka jingjia jong ka jingïaïuh para briew, u Myntri Rangbah ka Uttar Pradesh, u Yogi Adityanath, u la pynmih ïa ki jingbthah kiba bun kiba pynleit jingmut ha kaba ïadei bad ka jingpynïaid ïa ki riewngeit, ka jingpynïaid ïa ka leit ka wan, bad ka jingïatreilang hapdeng ki tnad treikam.
U Myntri Rangbah ka jylla u la hukum ban bishar bniah ïa ki jingpynbeit jong ka Maha Kumbh da u Chief Secretary bad u Director General of Police (DGP).
La bthah ïa u ADG bad ïa u District Magistrate jong ka Prayagraj ba kin pynthikna ïa ka jingmih kaba shngaiñ bad kaba suk na ka bynta baroh ki riewngeit na kane ka nongbah.
Ha ka jingïalang kaba la pynlong lynba ka durkhmih, ha ka miet jong ka sngi Balang, u Adityanath u la ai jingkren ïa ki heh pulit bad ki ophisar na kiba bun tylli ki distrik, kiba kynthup ïa ka Prayagraj, Kaushambi, Varanasi, Ayodhya, Mirzapur, Basti, Jaunpur, bad Rae Bareli, bad kiwei kiwei.
