Raipur, Rymphang:
Arngut ki lehnoh Maoist, ba kynthup ïa uwei u heh nongïalam, ki la ai ïa ka rai ba kin iehnoh ïa ki kam pyntriem bad ban leit hakhmat ka kynhun ki shipai pahara ha Kanker distrik jong ka Chhattisgarh, ong ki pulit ha ka sngi Balang.
Kumba la buh jingkheiñ la ong ba ki la don palat 2,700 ngut ki Naxal ki la leit pyndem ha ka jylla ha kine ki ar snem ba la leit.
U dkhot ka Divisional Committee jong ka CPI (Maoist) u Mallesh bad uwei pat u dkhot jong ka seng u Ranu Podiam dang shen ki la ïakynduh ïa ki pulit ka Kanker bad ïa ki shipai ka tnat Border Security Force (BSF) da kaba pynpaw ïa ka jingkloi jong ki ban pyndem bad ban shim ïa ka polisi pynbha pat jong ka sorkar, ong u Superintendent of Police u Nikhil Rakhecha.
Da kaba pynshong nongrim ha ki jingtip ba la ïasam da u Mallesh bad u Podiam, la ïaid shakhmat ban ïakynduh bad kiwei pat ki dkhot jong ka kynhun Maoist kiba trei shitom ha katei ka thaiñ bad ban pynshlur ïa ki ban ïasoh bad ki riewpaidbah.
Ka jingpynrung biang ïa u Mallesh bad u Podiam, kiba dei na ka north Bastar Division jong ki Maoist, sha ka imlang sahlang bad ka jingaiti ïa ki tiar ïaleh kaba pura, kan sa long kham hadien, u la bynrap.
U Inspector General of Police, Bastar Range, u Sundarraj Pattilingam, u la kyrpad ïa kiwei pat ki dkhot jong ka kynhun lehnoh Maoist ba kin sangeh noh ïa ki kam thombor bad ban phai biang sha ka jingim kaba bha.
Kumba ka long mynta, ka sorkar jylla ka la kyntu ïa ki lehnoh ba kin pyndem noh da ka mon lajong halor ka jingthmu ban pynkut noh ïa ki kam lehnoh.
Ki dkhot jong ka kynhun lehnoh ki dang don kiba dang pynibor pyrshah ïa ki bor ka aiñ kumba la sakhi ha kawei ka jingïasiat kaba markylliang hapdeng ki shipai bad ki lehnoh, ha kaba arngut ki lehnoh Maoist ki la ïap, kane ka jingïasiat ka la jia ha Bijapur distrik jong ka Chhattisgarh ha ka step jong ka sngi Palei, la ïathuh ki pulit.
Kane ka jingïasiat ka la jia ha kawei ka jaka khlaw harud ka wah Indravati ha ka por ba ka kynhun ba ïatreilang jong ki bor pahara ka dang pynlong ïa ka jingkhynra pyrshah ïa ki Naxalite.
Ka jingïasiat ka la neh katto katne kynta shwa ba kan jem noh, la bynrap shuh shuh ki pulit.
Hadien katei ka jingïasiat, ki bor pahara ki la lap ïa ki metïap jong ki arngut ki Maoist kiba phong Uniform na katei ka jaka.
Ki tiar kiba la ïoh kurup na katei ka jaka ki kynthup ïa ka Self-Loading Rifle (SLR), bad ka suloi INSAS bad ka tiar siat kaba 12-bore.
Hashwa kane, kata ha ka 3 tarik, Kyllalyngkot, ka kynhun jong ki shipai pahara ki la ïoh pynïap ïa ki 14 ngut ki lehnoh Maoist ha ki ar tylli ki jaka ba la jia ki jingïasiat ha ka thaiñ Bastar.
Ki jingbuh jingkheiñ jong ki pulit ki pyni ba ki la don 285 ngut ki Maoist kiba la shah pynïap ha ki jingïasiat bad ki bor pahara ha ka jylla ha u snem ba la dep.
Ka sorkar pdeng ka la buh ïa ka 31 tarik u Lber kum ka tarik ba khatduh ban pynduh ïa ki kam pyntriem jong ki lehnoh na ka ri, da kaba pynjur ïa ki kam pyrshah lehnoh kiba dang ïaid shakhmat ha ki jaka ba shah ktah.
