Shillong, Rymphang 03
Ka Nongpdeng CC ka la pynliem noh ïa ka Occult da 6 wiket na ka bynta ban ïoh jingjop ha ka Second Division Shillong Cricket League 2024-25 ha ka Lah Sngi U Blei.
Ha kane ka jingïakhun ka Nongpdeng kaba la jop kynting pisa ka la ailad shwa ïa ka Occult ban tied nyngkong ha kaba ka la ïoh 94 run bad shah pynhap 9 wiket ha ki 20 over. U Marty Mustafa u la tied 19 run na ki 29 bol bad u Ranjan Rai u la ïoh 16 run na ki 16 bol. Katba u Wanbor Lamare u la shim 2 wiket bad 1 wiket da u Banteilang Kharjana na ka bynta ka Nongpdeng.
Haba wan shimti ïa ka pali ba ar, ki nongtied ka Nongpdeng ki la lah ban pynurlong ban kynjoh sha ka thong da kaba ïoh 95 run bad shah pynhap 4 wiket ha ki 18.4 over. Kane ka la wan urlong lyngba ka jingïalehkai bha u Damonlang Sun uba la lah ban tied 26 run na ki 47 bol bad u Maitshaphrang Khongjee u la ïoh 21 run na ki 23 bol. Katba u Ashit Deb bad u Ranjan Rai ki la shim mar 1 wiket na ka bynta ka Occult. Ïa ka nam ‘Player of the Match’ la ïohpdiang da u Nerykupar Dkhar.
