Nongstoiñ, Rymphang 04
Ha ka janmiet jong ka 4 tarik u Rymphang, 2025 ki paidbah jong ka thaiñ Nongstoiñ kynthup ïa ki seng longkmie, seng samla, bad ki seng bapher bapher kumjuh bad ka Dorbar Shnong ki la mih paidbah ban pynrem ïa u ‘riew thrang snam uba la shim jyndat jubor ïa ka jingim jong ka samla Lilyioris Wahlang kaba la jia naduh ka 20 tarik u Kyllalyngkot 2025.
Ïa katei ka sur jingpynrem la sdang da ka jingïaid paidbah naduh na ïing ka lanot ter ter shaduh jingkieng Wahriat bad la pynkut pat da ka jingïalang kaba lyngkot ha phyllaw ka Market Complex New Nongstoiñ. Ha shuwa ban sdang ïa ka jingïalang la pynlong shuwa ka jingsngap jar kaba shi minit bad thang ruh ïa ki mombati kum ka dak jong ka jingsngewlem ïa katei ka samla.
Ka Kong A Kharsyntiew, Secretary ka Seng Longkmie New Nongstoiñ haba kren ha ka jingïalang ka la kyntu ïa ki bor jong ka aiñ ba kin shimkhia ïa katei ka kam bad ban kem noh ïa u briew ba donkti.
Ka la ong ruh ba katei ka jingjia ka dei ka jingjia kaba sngewtriem haduh katta katta bad ka la ong ruh ba ka jingïap jong katei ka samla katkum ka jingpynthikna ka dei ka jingpynïap im-im peit-peit ha u runar ïa kaba ym shym lah ban tip.
U samla D Sun, President ka WKSU Sengkmie u la ong ba ïa u ‘riew thrang snam uba la shim ïa ka jingim jong katei ka samla dei ban kem mardor bad kata ka dei ka jingdawa jong u paidbah bad u la ong ruh ba kin sa buddien ïa kane.
U la kyntu ruh ïa ka Dorbar Shnong New Nongstoiñ ba nangne ba ka dei ban khot ïa ka dorbar step lane ka dorbar sngi ban ïamir jingmut kumno ban tehlakam ïa ki jingwan thombor ki briew kiba nabar kiba pynjah burom ïa ka shnong ka thaw.
U Secretary ka shnong New Nongstoiñ u Bah G Marbaniang u la ong, ka jingshah thombor ïa ki kynthei khynnah haduh kine ki sngi kam pat kut, bad bun ki rally la ïohi ha kiwei kiwei ki jaka na ka bynta kine ki jingjia hynrei imat ba kam shym la kyrsiew thiah na ka bynta kine ki ‘riew runar kiba leh ïa ki kam kiba sniew, namarkata ka Dorbar Shnong New Nongstoiñ ryngkat bad ki kynhun seng, ki seng samla bad kiwei kiwei ka pynrem ïa kane ka jingjia.
“Ka ïing ka sem ka mad ïa ka jingshaïong kaba khraw, ka dong ka mad ïa ka jingsyier, ka shnong ka mad ïa ka jinglyngngoh,” u la ong.
U la ong ruh ba kane ka rally ka kyntu ïa ki bor jong ka aiñ ba la kumno-kumno na ka bynta kum kine ki jingjia ki dei ban shimkhia ban kem ïa ki khnang ba kiwei pat kin ym mlien shuh ïa kine ki kam.
Shuh shuh ha kane ka janmiet la ïoh ruh ïa ki jingkren na ki dkhot seng bapher bapher kynthup na ka KSU, HYC, MYF, RKS, WYF bad kiwei kiba la pynpaw ïa kajuh ka sur ban pynrem ïa katei ka jingjia ha ka jingdonlang ruh bahaïing bahasem.
