Shillong, Rymphang 04
Ka Voice of the People Party (VPP) ha ka Sngi Ba-ar ka la pynmih ïa ki ‘Mang Treikam’ jong ka seng na bynta ka ilekshon ban wan sha ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC).
Haba phai sha ka synshar-khadar, ka seng ka la kular ban pynbha ïa ka rukom treikam ka Khyrnit ba 6 jong ka Riti Synshar ka Ri, ban pynbha ïa ka rukom synshar trai-ri da kaba pynkhlaiñ bad pynjanai ïa ka synshar lyngba ka Dorbar, kumjuh ban thaw ki aiñ ki kyndon bad ban pynbha ïa kiba la don lypa.
Ka seng ha ka jingïalang pyllait ïa ki ‘Mang Treikam’ ka la kular ban pynneh ïa ka hok long kynrad halor ka khyndew ka shyiap, ki khlaw ki btap bad ki marpoh khyndew.
Ha kajuh ka por, ka la kular ban pynbha ban pynbeit ryntih ïa ka korbar-sorbar kam hapoh District Council ha ki tnad treikam bapher-bapher da kaba shna ïa ki kyndon ne ki aiñ kiba ïadei dur.
Haba phai sha ka mat treikam ban pynrung kam, ka seng ka la ban jur ban shna ïa ka mat treikam pynrung kam na bynta ka jingpynrung kam ïa ki nongtrei ha ki District Council.
Ka seng ka la kular ruh ban pyrshang pyntreikam ïa ka ‘E-Governance’ kat ha ki bynta kiba lah ban kham pynsuk ïa ki paidbah.
Na ka liang ka VPP ka la ïeng skhem ruh ha ka nongrim ban pyrshah halor ka jingtih ïa u marpoh khyndew ‘Uranium’.
Kumjuh, haba phai sha ka kolshor, ka seng ka kular ban pynneh bad kyntiew ïa ka kolshor jong ki trai-ri trai-muluk haba ïadei bad ka rwai ka shad bad ka put ka tem tynrai, bad ban thaw ïa ki mat treikam bad ki aiñ ryngkat ki lad ki lynti na bynta ban pynneh-pynsah bad kyntiew ïa ka rwai ka shad bad ka put ka tem tynrai.
Ka seng ka la kular ruh ban wad ki lad ki lynti ha ka ban tei ïa ka ‘Museum’ ne ka Ïing Kynshew Jingtip ba ïadei bad ka jaidbynriew, nalor ka jingkyntiew ïa ka kam jngoh kai pyrthei lyngba ka kolshor, ban thaw ïa ki mat treikam, ban wanrah ka jingïatreilang hapdeng ki District Council bad ki nongsynshar trai-ri halor kane ka bynta.
Haba ïadei bad ki ïew ka hat, ka seng ka la buh thong ban pynbha bad pynjanai ïa ki jaka long ïew bad jingpynïaid ïa ka khaïi-pateng ha ïew ban myntoi ki paidbah, ban ruh ban tehlakam ïa ka jingleh jubor pyrshah ïa ki nongrep.
Ka seng ka la kular ruh ban bishar bniah halor ka jingdon ki khyrdop khrong khajna bad ban tehlakam ïoh don ka jingpyndonkam bakla ïa ka jinglum khajna.
Ha ka liang ka pule-puthi bad kam wad bniah, ka seng ka pynshlur ïa ka pule-puthi bad kam wad bniah – ka ‘Library’ bad ki ‘Archive’, ban pynbha ïa ka ‘Library’ kaba la don lypa bad ban pyrshang shna ïa ka ‘Archive’.
Halor u pud u sam, ka VPP ka la kular ban wad bniah halor ka kajia pud bad ka Assam kumjuh ban peit pyrman ïa ka jinglong-jingman na ka por sha ka por ïa ki thaiñ khappud.
Shuh shuh, ka seng ka kular ban thaw ïa ki aiñ ba kyrpang ban ïada ïa ki um ki wah bad ki tyllong um, ban pynbha ïa ki aiñ ba ïadei bad ki khlaw ki btap, ban thaw ki lad ki lynti ban ïarap kyntiew ïa ki ‘law adong nalor ki ‘law kyntang.
Nalor kane, haba ïadei bad ki karkhana bad ka jingseng kam, ka seng ka kular ban da bishar bniah haba ai ïa ka NOC ïa kiba kwah seng kam karkhana – ban pyntikna ba kin wanrah jingmyntoi ïa ki trai-ri trai-muluk, bad ban pynshlur bad ai jingkyrshan ïa ki briew kiba seng kam lajong khamtam ha ki kam trei-kti bad karkhana ha la ïing.
