Shillong, Rymphang 04
Ka Inningstar Laitumkhrah ka la pynliem noh ïa ka NWCC JR da 2 wiket na ka bynta ban jam sha ka quarter final ha ka Third Division Shillong Cricket League 2024-25 ba la pynïaid da ka Shillong Cricket Association.
Ha kane ka jingïakhun pre quarter-final kaba la long ha ka Sngi Ba-ar ha madan Urkaliar, Shillong, ka NWCC JR ka la shimti shwa ban tied nyngkong ha kaba ka la ïoh 179 run bad shah pynhap 6 wiket ha ki 20 over. U Raja Barua u la khyrwit ïa ka shiteng spah run kaba 57 run na 29 bol bad u Ravi Shankar u la ïoh 45 run na 24 bol. Katba u Ajay Biswa u la shim 4 wiket na ka bynta ka Inningstar.
Haba wan shimti ïa ka pali ba ar, ka Inningstar Laitumkhrah ka la lah ban kynjoh sha ka thong da kaba ïoh 181 run bad shah pynkhyllem 8 wiket ha ki 18.4 over. U Akash Kumar u la tied 46 run na 24 bol bad u Gauri Shankar u la ïoh 43 run na 39 bol. Katba u Raja Barua u la shim 4 wiket bad 3 wiket da u Keshab Chettri na ka bynta ka NWCC. Ïa ka nam ‘Player of the Match’ la ïohpdiang da u Ajay Biswa.
Haba phai sha kawei pat ka jingïakhun, ka Sanmer CC ka la jop da 7 wiket ïa ka Laimer CC na ka bynta ban jam sha ka quarter final. Ka Laimer kaba la kam trai ban tied nyngkong ka la ïoh 107 run bad shah pynkhyllem 10 wiket ha ki 19.5 over. U Malcom Syiemlieh u la tied 35 run na 31 bol bad u Sunny Rai u la ïoh 29 run na 39 bol. Katba u Wadbor Shadap bad u Pynshngaiñ Dkhar ki la shim 4 bad 3 wiket na ka bynta ka Sanmer.
Haba wan shimti ïa ka pali ba ar, ka Sanmer ka la lah ban kynjoh sha ka thong da kaba ïoh 113 run bad shah pynhap 3 wiket ha ki 11.3 over. U Bor Marbaniang u la tied 27 run na 17 bol bad u Elton Kharmuti u la ïoh 24 run na 25 bol. Katba u Malcom Syiemlieh u la shim 2 wiket na ka bynta ka Laimer. Ïa ka nam ‘Player of the Match’ la ïohpdiang da u Pynshngaiñ Dkhar.
