Shillong, Rymphang 04
Wat la ka Nongrim Hills SC bad ka Laitkor SC ki la ïoh bun tylli ki kabu ksiar ha ka lympung ïalehkai Shillong Premier League 2024, hynrei ha kaba kut jong 90 minit ki la ïasam mar shi poiñ na ka daw bym lah thep kol ha ka jingïalehkai ba la long ha ka Sngi Ba-ar ha SSA Stadium kaba ha First Ground, Polo.
Kane ka jingïakhaid ka la pynlong ïa ka Laitkor ban don biang ha ka kyrdan ba saw ryngkat 17 poiñ bad ka Langsning FC kaba tam da ka jingïapher kol (+1 haduh -6). Kumjuh kam shym la don kano-kano ka jingkylla na ka bynta ka Nongrim Hills kaba don ha ka kyrdan hynñiew ryngkat 14 poiñ.
Ka Laitkor kaba la ïoh mynsiem lyngba ki nongkyrshan, ka la ïoh bun tylli ki ‘corner’ ha ka kylla step, hynrei kam shym la lah ban pynurlong satia. U Caldolan Kharmawphlang u la ïoh lai tylli ki kabu ksiar hynrei um shym la lah satia ban thep kol.
Ka sien kaba nyngkong jong u ka la sakhi ba u ïoh ka kabu kaba biang eh lyngba ka jingïarap pynbuh bol, hynrei um shym la lah ban thep kol. U nongap kol jong ka Laitkor, u Deranius Wahlang u la lah ban ïalehkai bha ryngkat ki rangïalehkai shadien ban pyllait na ka jingshah thep.
Kane ka lympung kan bteng biang ha ka Sngi Balang ha kaba ka Nongthym-mai SC kan ïakhun pyrshah ïa ka Shillong Lajong FC ha ka por 2:30 nohphai sngi. Ka Lajong ka la lah teng ban pynliem ïa ka Nongthym -mai da 6-1 kol ha ka wat kaba nyngkong.
