Itanagar, Rymphang:
Ka sorkar pdeng ka la mynjur ban shna ïa ka surok bah jong ka Arunachal Frontier Highway, ka projek pynroi kaba heh bha kaba thmu ban pynbha ïa ka jingpynïasoh ha ki jaka khappud, la pynbna u Myntri ka sorkar pdeng u Kiren Rijiju ha ka sngi Balang.
Haba kren ha ka jingrakhe Joint Mega Nyokum Yullo kaba nyngkong eh ha Boasimla, jong ka Kamle distrik, u Rijiju u la ong ba katei ka surok bah, ka ban ïaid lyngba ki 12 tylli ki distrik kiba don ha khappud ka India bad ka China, ka dei ka jingphohsniew kaba la urlong bad kaba la buh ban long ka Game Changer ïa ka jylla ka thaiñ Shatei-lam-Mihngi jong ka ri. ka jingmang pisa na ka bynta kawei ka projek pynroi da ka sorkar pdeng, la bynrap biang u Rijiju.
Kane ka surok bah, katkum ka jingkheiñ jong ka Border Roads Organisation, ka jrong kumba 1637-km bad ha ki katto katne ki jaka, kan ïaid haduh 20km sha u Line of Actual Control.
Ka jingpynroi jong ka ka ïahap bad ka jingpynleit jingmut jong ka sorkar Narendra Modi ban pynroi ïa ki shnong khappud, ban tei ïa ki jingtei ha ka thaiñ Shatei-lam-Mihngi, bad ban pynkhlaiñ ïa ki jingtei ha ki jaka khappud khnang ban pynsuk ïa ka jingïaid stet jong ki shipai.
U Rijiju u la ong ba katba ïa ki surok heh kum ka Mumbai-Pune Expressway, ka surok Jaipur-Delhi, bad ka surok bah Kolkata-Chennai la shna ha ka bynta kaba rit jong kane ka jinglut, ka Arunachal Frontier Highway kan donkam ïa ka jingbei tyngka kaba khlem pat ju jia mynno mynno ruh namar ka jingdonkam jong ka ha ka lynti treikam bad ka jaka kaba don jingeh.
Kane ka surok bah kan ïaid lyngba ïa ki distrik ba kongsan, ba kynthup ïa ka East Kameng, Bichom, Kra Daadi, Upper Subansiri, Shi-Yomi, Anjaw, bad Changlang, kaba ai ka jingpynïasoh surok kaba kongsan sha ki jaka ba jngai, u Rijiju u la bynrap, bad u la ong ba ki dang don shuh shuh ki projek kiba dang thmu na ka bynta ka jylla.
U Myntri ka sorkar pdeng u la kyntu shuh shuh ïa ki briew ban kyrshan ïa ki jingthmu jong ka sorkar, da kaba pynksan ïa ka jinglah jong ka Arunachal kaba heh bha ha ka Hydropower.
U la pynpaw ba ka sorkar pdeng, ha ka jingïatreilang bad ka NHPC, ka thmu ban pynroi ïa ki marpoh khyndew jong ka jylla ha ka rukom kaba ïahap bad kaba lah ban pynneh pynsah.
Ha kajuh ka por, u Rijiju u la ïaroh ïa ka jingdon lang jong u Vice President u Jagdeep Dhankhar ha kane ka jingïalang, da kaba ong ba ka dei ka por kaba kongsan bha.
“Ka Boasimla ka dei ka jaka kaba rit, kaba don harud ka surok bah jong ka ri… kan sah ha ka histori ba u Vice President ka ii India, u Jagdeep Dhankhar, u la wan jngoh ïa ka Boasimla mynta ka sngi”, u la ong.
U Rijiju u la batai ïa ka jingwan jong u Vice President kum ka jingsarong ïa ki paidbah ka Arunachal Pradesh, da kaba bynrap, “Ngi lah ban ong da ka jingsngew sarong ba u Vice President u la ïadon bynta lang bad ngi ha kaba rakhe ïa ka Nyokum Yullo.”
U Vice President u Dhankhar ha ka jingkren jong u u la pynpaw ruh ïa ka jingsngewskhem ba ka jingthmu jong u Rijiju ban shna ïa ka surok bah khappud ha Arunachal Pradesh kan sa urlong shen.
“Ka jingangnud jong ka Rijiju ban shna ïa ka surok bah ha khappud kan sa urlong shen namar la dep mang pisa,” u la ong.
Ka Nyokum Yullo ka dei ka tamasa ba kongsan jong ki jaitbynriew Nyishi ha Arunachal Pradesh, kaba pyni ïa ka jingroi jingpar bad ka jingïatylli ha ka imlang-sahlang.
