Tel aviv, Lber:
Hadien ka bynta ba nyngkong jong ka jingsangeh siat hapdeng ka Israel bad ka Hamas kaba la kut noh ha ka Sngi Saitjaiñ, ka ophis jong u Myntri Rangbahduh ka Israel- u Benjamin Netanyahu, ka la pynbna ba haduh mynta, ka Hamas ka la kyntait ban pdiang ia ka jingpynjlan por ban sangeh thma shipor, katkum ka jingtyrwa jong u nongmihkhmat jong u Donald Trump, u Steve Witkoff.
U nongaiktien jong ka Hamas u la ong ba ka jingkhanglad ïa ki marbam bad ki lad jingïarap baroh kiba dei ban poi sha Gaza ka dei ka jingleh thok kaba jur bad ka jingleh pyrshah ïa ka jingïateh kular ban sangeh thma bad u la kyntu ïa ki nongpynïasuk ban tuklar halor kane ka jingleh don bor jong ka Israel.
Namar la ong ba katei ka kynhun lehnoh jong ka Palestine, ka kwah ba ka bynta kaba ar jong ka jingïateh kan ïaid shakhmat kumba la ïakren hashwa, da kaba pyllait noh ïa ki nongshah rahbor bad ki koidi na Palestine baroh kiba dang sah ha ka kti jong ka Israel bad ban weng noh ïa ki shipai jong ka Israel baroh napoh ka nongbah Gaza Strip.
Namar ka Hamas ka la dep kren ruh kham mynshwa ba kan ym mynjur ïa kano- kano ka jingpynjlan ïa ka bynta kaba nyngkong khlem ki jingkular na ki nongpynïasuk jong ka US, Qatar bad Egypt.
Ka kyrwoh na ka ophis jong u Netanyahu ka la ong ba ka jingkut jong ka bynta ba nyngkong jong ka jingïateh kular ban iapyllait briew markylliang, bad ha ka jingshai jong ka jingkyntait jong ka Hamas ban pdiang ïa ka jingthmu jong u Witkoff naka bynta ban bteng ïa ki jingïakren – ha kaba ka Israel ka la mynjur – u Myntri Rangbahduh ka ri u Netanyahu u la rai ba, naduh ka step kaba bud, baroh ki jingpyniaid ia ki mar ki mata bad ki lad jingiarap kiba dei ban poi sha Gaza, yn pynkut bad khang noh baroh.
