UK, Lber:
U Myntri Rangbah-duh ka Britain, u Kier Starmer, ha ka Sngi U Blei, u la ong ba ka UK ka la pdiang ïa ka jingkyrpad jong ka US ban ailad ïa ka US ba kan ther ïa ka Iran na ki jaka pynher ‘namding jong ka UK.
Namar la ong ba ka United States, ha kine ki khyndiat sngi jong ka taïew ba la dep, ka la pan jingbit na ka UK ba kan ailad ïa ka US ban pyndonkam ïa ki jaka ther ‘namding jong ka Britain, ha kaba ka Britain na kaba sdang kam shym la mynjur ban ailad ïa kane ka jingkyrpad jong ka US.
Kumta, u Starmer u la ong ba ka Britain kam shym kwah ban ïadon kti lang ha ka jingleit thombor jong ka US bad Israel pyrshah ïa ka Iran, ha kaba u nongïalam ba hakhlieh duh jong katei ka ri- u Ali Khamenei u la shah thombor bad duh noh ïa ka jingim jong u ha kitei ki jingleit khynra bad jingthombor jong ka US bad Israel ha ka Sngi Saitjaiñ. Hadien kata, utei u nongïalam jong ka Britain u la ong ba ka UK kan nym kyrshan ïa katei ka thma jong ka US bad Israel bad kam kwah ban ai jingkyrshan ne ai mynsiem ïa kano- kano ruh ka thma kaba jia ha kane ka pyrthei mynta. Hynrei ka hap ban pdiang ïa kane namar ki jingiadei kam bad ka US ha ki por ki ban wan.
Hynrei, u la ong ba ka Iran pat kam shym map, ka la ther kylla ia ka Britain, sha kito ki thaiñ ba don ki shlem treikam ki bor pahara jong ka UK bad sha ki hotel bad jaka sah jong ki nong UK.
“Ka rai jong ngi ba ka UK kan ym donkti bad ki jingshah thombor ha ka Iran ka dei kaba la thmu, ym tang namar ba ngi ngeit ba ka lad kaba bha tam na ka bynta ka thaiñ bad na ka bynta ka pyrthei ka dei ka jingïapynbeit da kaba ïakren, kawei ha kaba ka Iran ka mynjur ban iehnoh ïa kino kino ki jingangnud ban pynmih ïa ki tiar nuclear,” u la ong.
“Hynrei ka Iran ka dang pynkhih ïa ki jingmyntoi jong ka ri Bilat watla katta ruh, bad ka buh ïa ki briew jong ka ri Bilat ha ka jingma kaba khraw.”
Ki paralok jong ka ri Bilat ha ka Gulf ki la pan na ka ban ïarap kham bun ban ïada ïa ki, u la ong, bad ka dei ka kamram jong u ban ïada ïa ki jingim jong ki nong Bilat.
Ki liengsuiñ ïapom jong ka ri Bilat ki la dep ban ïashim bynta ha ki kam ïada ba la ïatreilang bad ki la khanglad ïa ki jingshah thombor jong ka Iran, u la ong, hynrei tang kawei ka lad ban khanglad ïa ka jingma ka long ban pynduh pyndam ïa ki namding ha ka jaka ba ki mih ha ki jaka buh ne ki jaka pynher namding.
Kumta u la ong ba ka jingpdiang ïa ka jingkyrpad jong ka U.S., namarkata, ka la long halor ka “jingïada ïalade lang jong ki paralok bad ki paralok ba la slem bad ban ïada ïa ki jingim jong ki nong Bilat” katkum ka aiñ jong ka pyrthei.
