Guwahati, Lber:
Ki pulit ka Assam ki la ïoh ban kurup haduh 992.13 gram u drok Heroin ba shongdor T.5 klur bad ki la kem saw ngut ki briew ha ka jingkhynra pyrshah ïa u drok ha Sivasagar distrik ha ka 4 tarik, Lber.
Ïa kane ka jingkhynra lang la pynlong da ki pulit ka Sivasagar bad ki pulit jong ka Golaghat distrik, ha kaba la ïalam da u Additional Superintendent of Police (Crime) ka Golaghat u John Das. Kane ka jingkhynra la pynshong nongrim halor ki jingtip ba la ïoh na ki pulit Sarupathar ha ka mukotduna number 18/24 katkum ka kyndon 21(c) bad 29 jong ka NDPS Act.
Ki pulit ki la bat ïa ar tylli ki kali Bolero-kawei kaba don ïa u number AS-03AK-8070 bad kawei pat ka bym don nombar-ha Halwating. Kawei ka kamra kaba la buhrieh ha kawei na ki kali ka don 65 tylli ki song jong u drok Heroin.
Kine ki briew kiba la shah kem ki dei kiba la tip kyrteng kum u Pinku Debnath, u Narayan Debnath, u Baburam Konwor, bad u Rabi Jaiswal. Ki pulit ki la ïathuh ba u Jaiswal, uba shah kynnoh ba u dei u snar nongïalam ha ka jingjia ha Sarupathar, u la phet krad naduh u bnai Naitung, 2023. La kynnoh ba ïa une u mar la kit na kawei ka jylla ba marjan bad la thmu ban leit sha Tinsukia.
U Myntri Rangbah ka Assam u Himanta Biswa Sarma u la kam ïa kane ka jingkhynra ha ka rynsan X da kaba ong, “La ïoh kurup ïa ki drok kiba shongdor T.5 klur tyngka. Ha ka jingkhynra lang jong ki pulit ka Golaghat bad u Sivasagarpol ha Haluwating, la ïoh ban kurup 992.13 gram u drok bad ar tylli ki kali Bolero, bad la kem ruh ïa saw ngut ki briew.”
Shwa ïa kane, ha ka 20 tarik, Kyllalyngkot, ki pulit ka Assam ki la ïoh kurup ïa u drok uba shongdor T.1 klur tyngka ha Cachar distrik bad ki la kem ïa uwei u briew. Ïa kane ka jingkhynra la pynlong ha Digharkhal Toll Gate kaba hap hapoh jong ka Kalain Police Station haba la ïoh ïa ki jingtip barieh.
