Patna, Lber:
Kawei ka khynnah pule ba la tip kyrteng kum ka Khushboo Kumari bad pule klas 11 ha kawei ka kolej ha Bihar, ka la ïoh ïa ka phone call kaba khlem poi pyrkhat na u Myntri ka tnat pule puthi jong ka sorkar pdeng, u Dharmendra Pradhan ha ka Sngi U Blei. U Myntri ym tang ba u la pynthikna ïa ka jingrung jong ka ha ka Science Stream, hynrei u la kular ruh ban ai ka jingkyrshan kaba pura ban pynurlong ïa ka jingangnud jong ka ban long doktor.
“Ka long kaba ym lah ban ngeit ïa ka khynnah kynthei kaba duk kum ma nga ban ïohsngew na u Myntri ka tnat pule-puthi jong ka sorkar pdeng. U la long uba don akor haduh katta katta ba ngam lah ban ngeit ba u briew uba don sha kawei pat ka liang u dei u Myntri sorkar pdeng,” la ong ka Khushboo kaba la sngewkmen.
Ka Khushboo, ka la ïathuh ïa ki jingeh jong ka, ha ki Social Media, ha ka 8 tarik Lber, kaba dei ka sngi rakhe ïa ka Women’s Day. U kpa jong ka, u Upendra Rai, uba dei u nongai dud kum ka lad kamai, u la pynpaw ïa ka jingbymlah jong u ban siew ïa ki jinglut jingsep kiba la pynlut ha ka jingpule jong ka kum ka samla pule Biology.
Kumta, ka la ïoh ban rung ha ka Arts steam ha kawei ka kolej kaba don ha Danapur, kaba don sha rud jong ka nongbah jong ka jylla.
“Nga la ïoh 399 na ka 500 ha ka eksamin klas 10 jong nga. Hynrei ngam shym la lah ban ïoh rung ha ka Science Stream. Nga la shah pynbor ha ki kmie ki kpa jong nga ban shim Admission ha ka kyrdan Arts ha ka jaka jong ka Science,” ka la ong haba ïathuh ïa ka jingbym lah jong ki kmie ki kpa ban siew ïa ka jinglut jingsep ha ka jingpule jong ka ha ka Science.
Ka Khushboo, kaba dei ka khynnah kaba rit tam napdeng ki 5 ngut ki para jong u Upendra Rai, da ka jingsngew artatien ka la rai ban bud ïa ka jingbthah jong ki kmie ki kpa jong ka namar ba ki hynmen jong ka ki la ïoh palat 400 marks ha ka eksamin klas 10 bad la shah ïa ki ban bteng ïa ka jingpule jong ki ha ka Science Stream kaba ki la jied.
“Hynrei ngam shym la long kaba donbok haduh katta katta bad nga la bakla ban tam 400 mark, kaba la pynbitar ïa ki kmie ki kpa jong nga,” ka la pynpaw.
“Nga la pynpaw ïa ka jingsngewnguh ïa u Myntri ka sorkar pdeng shwa ba un pyndkut noh ïa ka laiñ phone”, la ong ka Khushboo kaba sah bad ki kmie ki kpa jong ka ha ka shnong Hetanpur kaba hap hapoh ka Danapur sub-division haba kren ha u nongthoh khubor ha ka lah sngi U Blei.
U kpa jong ka Khushboo, u Upendra Rai bad ka kmie jong ka, ka Chunakshi Devi, ki la sngewkmen halor ka jingkular jong u Myntri sorkar pdeng ban ai ïa ki jait jingïarap baroh sha ka khun barit jong ki, kaba la buh jingkynmaw ïa ka jingangnud ban long doktor.
“Lada kiei kiei kin ïaid katkum ka jingkhmih lynti, kan sa lah ban pynurlong ïa ka jingangnud jong ka ban long doktor,” ong u Upendra Rai, uba pynïaid ïa ka ïing ka sem jong u da kaba die dud.
“Ka jinglong ka ïoh ka kot jong ngi kam shym la ailad ïa ka Khushboo ban bteng ïa ka jingpule ban long doktor. Hynrei kiei kiei kin sa nangbha ha ki sngi ban wan namar baroh arngut u Myntri ka sorkar pdeng bad ki bor pynïaid distrik ki la pynthikna ban ïarap ïa ka ban bteng ïa ka jingpule ban long doktor.
U Rai, u kpa jong ki lai ngut ki khun shynrang bad arngut ki khun kynthei, u la pynkynmaw ba u Myntri ka sorkar pdeng u la ai jingmut ïa ka Khushboo ba kan sdang noh ïa ki jingpynkhreh na ka bynta ka NEET ba kan lah ban ïoh rung ha ka kolej doktor.”Ka Khushboo ka kham shimkhia ïa ka jingpule jong ka hadien ba ka la sngap ïa u Myntri ka sorkar pdeng u Dharmendra Pradhan” u la pynpaw.
Ka Chunakshi Devi ka la ong ba u Pradhan u la ai mynsiem ïa ka Khushboo bad u la kyrpad ïa ka ba kan bud ïa ka jingangnud jong ka ban long doktor. U la ai khublei ruh ïa ka jingkut jingmut bad jingaiti jong ka Khushboo ban pynurlong ïa ka thong jong ka ha ka jingim.
Haba ïakren bad u Magistrate jong ka Patna distrik, u Chandrashekhar Singh u la ong ba ka bor pynïaid distrik kan pynthikna ba ka Khushboo kan ïoh Admission ha ka Science Stream ha ka kolej kaba ka jied.
Ki ophisar ba la buh ha Danapur sub-division ki la don lypa ha ka kam. “Ka bor synshar kan kit ïa ka jinglut ha ka jingpule jong ka khynnah kynthei,” ong u DM bad bynrap ba ki don ki kyndon ban ïarap ïa kum kine ki samla pule.
U para jong ka Khushboo, u Sipin Kumar, u ïathuh ba uwei u ophisar na Danapur, u la leit sha ïing jong ki, ban ïalam ïa ka Khushboo, sha ophis jong u DM, ha ka sngi U Blei.
Ka Khushboo, kaba la kylla long kynsan kynsan kaba la shah phai khmat ha baroh, ka la ong, “Nga ainguh ïa u Myntri sorkar bad ki bor synshar kiba donkti kiba la sngap ïa ka jingsngew jong nga kumba nga la pynpaw shaphang ki jingeh bad ai jingkyrshan ïa nga.” “Ngan sa long doktor ha kawei ka sngi,” ka la ong.
