Patna, Lber:
U President jong ka seng RJD, u Lalu Prasad, ha ka sngi Balang, u la leit mih hakhmat ka kynhun Enforcement Directorate, kaba la khot hajir ïa u, ha kaba ïadei bad ka jingtohkit jong ka, halor ka kam thok kam tuh kaba ïadei bad ka jingskud jaka na ka jingaikam, la ong ki heh jong ka kynhun.
Une u nongïalam uba don hapdeng ka jingshitom u la poi ha ka ophis jong ka kynhun ED ha Bank Road ha Patna ha ka por 10.30 baje mynstep bad u la mih noh na katei ka jaka hadien ba la shah tohkit haduh saw kynta.
Ka khun heh jong u Prasad, ka Misa Bharti, kaba dei ruh ka MP jong ka RJD na Pataliputra, ka la synran lang ïa u kpa jong ka.
Ka surok kaba leit sha ophis jong ka kynhun ED, ka la ïai sawa da ki jingpyrta ban ïaroh ïa u Prasad, kiba la pynmih da ki nongtrei ka RJD kiba la ïa lum paidbah.
Ha ka sngi Ba-ar, ka kurim jong u Prasad, ka Rabri Devi bad u khun rangbah jong u, u Tej Pratap Yadav, baroh arngut, ki la shah kynnoh donktilang ha ka mukotduma.
Ha kajuh ka por, u khun ba kham rit jong u Prasad bad u nongïoh pateng u Tejashwi Yadav, uba la jer kyrteng ruh kum uba shah kynnoh donkti ha ka jingjia, u la ong ha ki nongthoh khubor, “Katba ngi nang shah pyndik, katta ngin nang khlaiñ. Hooid, ka mukotduma ka dei kaba la pynlong da ka saiñ pyrthei. Lada ngam shym la don ha ka saiñ pyrthei hadien ka ilekshon Delhi, ngam shym la shah khring ha kane ka ilekshon Assembly ha Delhi ha kaba mynta ki kynhun tohkit kin pynphai ïa ka jingpeit bniah jong ki sha ka Bihar.”
Hynrei ka JD(U) MLC bad u nongaiktien u Neeraj Kumar u la kynnoh ba “u Lalu Prasad u kheit ïa kaei kaba u la bet. Kum u Myntri Rangbah jong ka Bihar ha kata ka por, u la donkti ha ka kam thok lyngba ki jingbah jong ki jingri.
U la shah rai pynrem ha ka ïingbishar bad u la ïeng khlem bit ban ïakhun ilekshon.
Ka jingmudui jong ka kynhun CBI ha kaba ïadei bad ka kam bamsap kaba la mih lyngba ka jingbam jong ki jingri ka dei kaba la mudui ha ka por ba long Myntri Rangbahduh u Inder Kumar Gujral ha kaba u heh nongïalam jong ka seng RJD u la ïadonktilang.”
Ka jingleh thok kaba long na ka jingïoh jaka hadien ka jingaikam ka la long ha ka por ba u heh nongïalam jong ka seng RJD u dei u Myntri ka tnat Railway ha ka samoi treikam kaba nyngkong jong ka sorkar UPA ba la ïalam da ka seng Congress.
