Shillong, Lber 19
U khlur ïalehkai ka Argentina u Lionel Messi, u la sam ïa ka khubor hadien ba u la shah weng noh na ka kynhun ïalehkai jong ka ri, na ka bynta ka FIFA World Cup qualifier pyrshah ïa ka Uruguay bad ka Brazil.
U Messi u la mynsaw ha ki bynta jong ki lbong kjat, la pynthikna da ka Inter Miami. Une u rangïalehkai ba 37 snem ka rta u la sngew bym shngaiñ shuh ha ka por ba ka Inter Miami ka la jop ïa ka Atalanta United da 2-1 kol, ha kaba u la thep ïa ka kol nyngkong na ka bynta kane ka kynhun.
U Messi, u la sdang da ka jingbym lah ban ïalehkai bha ha kane ka samoi ïalehkai ha USA, namar ba u la ïakynduh ïa ki jingeh ha ka koit ka khiah. Ha kane ka taïew, u Messi u la duh ïalehkai ha ki lai tylli jingïakhun, hynrei u la wanphai biang ha ka Sngi Palei na ka bynta ka jingïakhun jong ka wat ba ar pre-quarter final jong ka CONCACAF Champions Cup pyrshah ïa ka Cavalier SC. Pynban da kane ka jingmynsaw kaba dangshen ka long ka jingma kaba khraw ïa ka kynhun ïalehkai jong ka Argentina.
Une u khlur ïalehkai uba la khur haduh phra sien ïa ka khusnam Ballon d’Or u la pynmih ïa ka khubor ha ka Instagram ha kaba u la pynpaw halor ka jingbym lah jong u ban ïashim bynta ha ka jingïakhun ïa ka FIFA World Cup qualifier.
“Ka long kaba sngewsih ban duh ha kum kine ki jingïalehkai kiba kham kyrpang pyrshah ïa ka Uruguay bad ka Brazil. Kumba ju long, nga la kwah ban don hangtei, hynrei ha ka khyllipmat kaba khatduh, ka jingmynsaw kaba khlem da jur bha kaba pynbor ïa nga ban sangeh shipor shwa ban wanphai biang sha ka jingïalehkai,” la bynrap u Messi ha ka Instagram jong u.
“Nangne, ngan sa ai mynsiem bad kyrshan kum uwei pat u nongkyrshan jong ka Argentina!” u la pynkut ïa ka khubor jong u.
Ka Argentina, kaba long lahduh ha ka World Cup, ka lah ban pynthikna ba kan rung sha ka lympung jong u snem ban wan ha ki ar tylli ki jingïalehkai jong ka. Kane ka kynhun ka la lamkhmat ïa ki 10 tylli ki kynhun ïalehkai jong ka South America da kaba tam 5 poiñ ïa ka Uruguay ha Montevideo.
Kumjuh, ka Argentina kan duh ruh ïa u Paulo Dybala rangïalehkai ka Roma, uba la mynsaw bad u rangïalehkai shadien ka River Plate u Paulo Montiel. U Lionel Scaloni u la weng ruh ïa u Alejandro Garnacho bad u Claudio Echeverri na ka kynhun ïa kaba la pynbna ha ka 2 tarik mynta u bnai.
