Shillong, Ïaïong 08
Ka kynhun ki ‘thei ïalehkai ka Jylla ka la pynliem noh ïa ka Mizoram da 33 ron ha ka jingïalehkai ba nyngkong jong ka 2nd NECDC Senior Women’s Inter-State Tournament 2025 ha ka sngi Ba-ar ha Rangpo, Sikkim.
Ïa kane ka jingïalehkai la sdang ha ka Lah Sngi U Blei ba la pynïaid da ka North East Cricket Development Council bad la pynlong ïa kane ka jingïalehkai da ka Sikkim Cricket Association.
Haba phai sha ka jingïalehkai dei ka Mizoram kaba la jop kynting pisa bad ka la jied shwa ban kawang bol nyngkong. Ka Meghalaya haba wan shimti ban tied ka la ïoh 112 run bad shah pynhap 6 wiket ha ki 20 over. Ka Luiza Tamang ka la tied 34 run na 27 bol, kumjuh ka Debasmita Dutta (28 run na 26 bol), Ankita Sarma (20 run na 19 bol) bad ka Monica L. Phawa (12 run na 19 bol). Ka Luiza kaba la khyrwit lai tylli ki ‘six’ ka la lah ban ïatied lang ryngkat ka Debasmita na ka bynta ban kynjoh sha 51 run na ka bynta ka wiket kaba nyngkong.
Haba wan beh ïa ka thong, ka Felfeli Pautu bad ka Hmangaihsangi ki la tied 31 bad 30 ron, hynrei ka Debasmita bad ka Daiaka Emigale Warjri ki la lah ban ïakhun tyngeh na ka bynta ban khanglad ïa ka Mizoram ban ïoh tang 79 ron ha ki 18.2 over. Ïa ki lai wiket la shim da ka Debasmita (3/12) bad ka Daiaka (3/16), katba ïa ki ar wiket la shim da ka Indariakor K. Wanñiang (2/13).
Ka Debasmita, kaba la lah ban ïalehkai bha, ka la ïohpdiang ïa ka nam ‘Player of the Match’ bad ka la ïohpdiang ïa katei ka khusnam na u Secretary ka Meghalaya Cricket Association, Bah Rayonald Kharkamni.
Ha kane ka lympung ki don hynriew tylli ki kynhun ha kaba la phiah sha ar tylli ki group. Ka Meghalaya ka don ha ka Group-A kaba kynthup lang ïa ka Nagaland bad ka Mizoram. Katba ka Manipur, Arunachal Pradesh bad ka Sikkim ki la don ha ka Group-B.
Te kumta ka Meghalaya kan pynkhreh ïa ka jingïakhun ba ar pyrshah ïa ka Nagaland mynta ka Sngi Balang.
