Nongstoiñ, Ïaïong 18
Ka Nongpyndeng SC ka la rung sha ka semi final jong ka lympung 1st Division mynta ka samoi.
Kane ka jingjop bad ka nam tam jong ka Nongpyndeng SC ka dei hadien ba ka la lah ban pynliem noh da 4 kol la 0 ïa ka Ramsngiwar SC ha ka jingïalehkai quarter final kaba nyngkong jong ka 1st Division kaba la long ha ka sngi Palei jong ka taïew ha madan New Nongstoiñ.
Ïa kitei saw tylli ki kol jong ka Nongpyndeng la ïoh ban thep da u Aibor Syiem ha ka minit kaba 26, u Pynbianglang Kharsyntiew ha ka minit kaba 43, u Rodyson Dkhar ha ka minit kaba 74 bad u Shem Rynshiang ha ka minit kaba 90+1.
Lah ban kdew hangne ba ka jingïalehkai quarter final kaba ar jong ka 1st division kan long biang ha ka 19 tarik u Ïaïong 2025 ha kaba ka kynhun ïalehkai jong ka Sapki West kan ïakhun pyrshah ïa ka Lad Nongsba ha ka por 12 baje nohphai sngi bad ka Mawkhlam pyrshah ïa ka Steplanglur ha ka por 2.00 baje nohphai sngi.
Shuh-shuh ka jingïalehkai quarter final kaba khatduh ha ka kyrdan 1st Division pat kan long ha ka 22 tarik hapdeng ka Nongkhlaw pyrshah ïa ka Marskuin ha ka por 2.00 baje nohphai sngi.
