New Delhi, Jymmang:
Halor ki khubor ba dang shen ha ki lad pathai khubor kiba pynpaw ïa ka jingkiew jong ki nongpang COVID-19 ha Singapore bad Hong Kong, ka tnad ka Koit ka Khiah ka la pynlong ïa ka jingïalang bishar bniah ha ka lah sngi U Blei.
Ha kane ka jingïalang la kynthup ïa ki riew shemphang na ka National Center for Disease Control (NCDC), ka tnat Emergency Medical Relief (EMR), ka Disaster Management Cell, ka Indian Council of Medical Research (ICMR), bad ki nongmihkhmat na ki hospital sorkar pdeng, katkum ki tyllong khubor kiba lah ban shaniah. Ïa kane ka jingïalang la ïalam da u Director General ka tnad ka Koit ka Khiah (DGHS).
Ki riew shemphang ki la ïasam ba ka jingkiew jong ki nongpang COVID-19 ba la ïohi ha Singapore bad Hong Kong khamtam eh ka dei ïa ki jingpang ba rit, khlem da don ki rukom ba pher jong ka jingpang ba jur ne jingïap ba la pyntip haduh mynta.
Da kaba pynshong nongrim ha ka jing-long-jingman bad ki jingtip ba mynta, ka kynhun ba dei khmih ka la pynkut ba u COVID-19 u dang don ha ka jingpynïaid kaba bha ha India.
Haduh ka 19 tarik u Jymmang, 2025, ka jingdon jong ki nongpang COVID-19 ha India ka long 257 ngut, ka jingkheiñ kaba duna bha haba pyrkhat ïa ka jingbun briew jong ka ri. La jan baroh ki nongpang ki mad ïa ki dak ki shin jong ka jingpang bad kim donkam ban shah sumar ha hospital.
Ka India ka dang ïai bteng ban pynneh pynsah ïa ka Network kaba khlaiñ bha na ka bynta ki khñiang jingpang ba pynhiar mynsiem, kynthup ïa u COVID-19, lyngba ka Integrated Disease Surveillance Programme (IDSP) bad ki jingpyrshang ba la ïalam da ka Indian Council of Medical Research (ICMR).
Ka tnad ka koit ka khiah jong ka sorkar pdeng ka la pynksan ïa ka jingkular jong ka ban long kiba husiar bad peitngor da kaba buddien beit ïa ki jingjia bad pynthikna ïa ka jinglong ba la pynkhreh ban pyntreikam ïa ki lad jingïada paidbah kiba donkam.
