New Delhi, Jymmang:
Ka Supreme Court, ha ka sngi Balang, ka la kyntait ban pdiang ïa ka jing- mudui jong u nongïasaid aiñ, uba pan ban buh jingmudui da ka ejahar pyrshah ïa u nongbishar jong ka Allahabad High Court, u Justice Yashwant Varma, ha kaba ïadei bad ka jingjia ba la kynnoh ba la lum pisa beaiñ.
Ka ïingbishar kaba don ar ngut ki nongbishar jong ka ïingbishar ba ha khlieh duh, ba la ïalam da u Justice Abhay S. Oka, ka la kyntait ban bishar ïa ka jingujor ba la mudui da u nongïasaid aiñ u Mathews J. Nedumpara. Ka ïingbishar ka la ai jingmut ïa u ba un leit shwa sha ka bor ba dei peit da ka rukom ban ïakren shwa ban rah ïa kane ka kam sha ka ïingbishar ba ha khlieh duh.
“Ka la don lypa ka jingtohkit, Nedumpara. Ïa ka kaiphot la phah sha u Myntri Rangbah bad sha ka President ka Ri India. Buh ïa ka jingbatai ha khmat jong ki. Lada kam don kano kano ka jingleh, to wan sha ngi”, la ong ka kynhun nongbishar.
U Nedumpara u la kynthoh ba la leh ïa ka kam runar bad la ïoh biang ïa ka pisa. “Ka kamram jong ka ïingbishar ka long ban pynïaid ïa ka aiñ. Ka jingbishar jong u K. Veeraswami ka long kaba sniew… sngewsih ban ong kumta… hynrei dei ban bishar biang ïa ka,” u la aiti, da kaba pan jingbthah na ka bynta ban ujor ejahar pyrshah ïa u Justice Varma.
Ha ka jubab, ka ïingbishar ka la kynthoh, “Ngi sngewnguh ïa ka jingnang jong phi ïa ka ktien Latin, hynrei sngewbha bud ïa ki rukom treikam ba kongsan jong ka aiñ. Ha ka jingujor ban ïoh ïa ka jingujor Mandamus, phi dei ban leit shwa sha ka bor ba dei peit ryngkat bad ka jingpynpaw.”
Ka ïingbishar ka la bynrap, “U nongmudui u dei ban wad jingpynbeit hakhmat ka bor ba dei peit da ka rukom ban mih markhmat. Ngi kyntait ban sngap ïa ka jingmudui.”
Ka kynhun nongbishar jong ar ngut ki nongbishar jong ka Apex Court, ba la ïalam da u Justice Abhay S. Oka, ka la kyntait ban bishar ïa ka jingujor ba la mudui da u nongïasaid aiñ u Mathews J. Nedumpara.
U Nedumpara u la leit mih sha ka Supreme Court halor ka jingdawa na ka bynta ban mudui ejahar pyrshah ïa u Justice Varma.
Ha ka 8 tarik u Jymmang, hadien ka jingmudui da ka komiti hapoh ka ïingbishar ba la thung da ka Supreme Court, u Sanjiv Khanna (u la shongthait mynta) u la phah ïa ka shithi sha ka sorkar pdeng ban ai jingmut ban weng noh ïa u Justice Varma.
U CJI barim u la ai ïa kane ka jingai jingmut hadien ba u la ïoh ïa ka kaiphot jong ka komiti, kaba la lap ba u Justice Varma u la leh bakla. Namar ba u nongbishar Varma u la kyntait ban iehnohkam, u nongbishar Khanna u la hap ban shim ïa ka sienjam kaba tyngeh.
U heh jong ka ïingbishar ba hakhliehduh, uba kren khlem da kwah ban pynpaw kyrteng, u la pynthikna ba “la kyrpad ïa u Justice Varma ban iehnohkam hadien ka jingshah kynnoh jong u, hynrei u la kyntait.”
