Thiruvananthapuram, Jymmang:
Ka jylla Kerala ka la pyntip ba la don ar ngut kiba ïap na ka jingpang Covid ha u bnai Jymmang, ki jingïap ba nyngkong hadien ka jingïapher kaba slem, kaba la pynkiew ïa ka jingïap na ka jingpang khlam ha ka jylla sha ka 72,141 ngut naduh ba sdang ka khlam ha u snem 2020.
Ki nongpang ba dang shitom ki la kiew arshah tang ha ki ar sngi, ki la poi sha ka 182 ngut haduh ka 21 tarik u Jymmang. Ha kaba ïadei bad kane ki heh ka tnat ka koit ka khiah ki la ong ba kam pat don kano kano ka jingbuh jingmaham ha kaba ïadei bad kane ka jinglong jingman.
Ki ar ngut kiba la ïap, ki dei ki shynrang briew kiba don ha ka rta kaba 59 bad 64 snem bad ki la khlad noh ha kawei ka hospital shimet ha Thiruvananthapuram.
Uwei u rangbah, 59 snem ka rta, u dei uba shong ba sah ha Thalavur ha Kollam bad u la shah sumar ha ka 19 tarik Jymmang, namar ka jingshitom ha ka ban ring bad pynhiar mynsiem bad u la khlad noh ha ka sngi kaba bud.
U ba ar uba la ïap u dei trai shnong jong ka Vazhayila ha Thiruvananthapuram bad u la khlad noh ha ka 16 tarik u Jymmang.
Ki tyllong khubor na ka tnad ka koit ka khiah ki la pynthikna ba baroh ar ngut kiba, ki dei na ka daw jong u Covid, watla ki nongpang ki don ïa ki jingpang ba shapoh jong u klongsnam bad kiwei kiwei ki jingpang ba ïadei bad kane.
Ki heh ka koit ka khiah ki la ong ba ka jinglong jingman kam long kaba shyrkhei bad ka jingpyntip ïa ki nongpang ka pyni tang ïa ka jingkhlaiñ bad jinglong ba husiar jong ka tnad ka koit ka khiah.
“Ki hospital ki dang bud ryntih ïa ka kyndon ba la dei ban test ïa ki longkmie ba armet bad ki nongpang ba shah sumar na ka bynta u Covid, kaba ïarap ban tip ba ki briew ki shah ktah ha ka jingpang. Ki nongpang ba ju ïoh ïa ka jingshit kaba man ka por ha ka jingïalang kim ju test,” ong uwei u heh sorkar.
Ka Kottayam (57), ka Ernakulam (34), bad Thiruvananthapuram (30), ki dei ki jaka ba bun eh kiba ïoh pang dang shen ha ka Jylla.
Ka jingkiew ka jinglap ïa ki nongpang ka lah ruh ban ïadei bad ka jingpynkhlaiñ ïa ka jingpeitngor namar ka jingkiew jong ki nongpang Covid ha kylleng ka thaiñ Southeast Asia.
“Kiba bun ki jingpang ki dang long kiba jem, hynrei ki briew kiba don ïa ki jingpang kiba la don lypa ki dang lah ban shah ktah ha ka jingpang kaba jur bha,” la bynrap biang une u heh sorkar.
Ka jingkiew jong ki nongpang dang shen la ngeit ba ka dei kaba la pynlong da ki jait jingpang Omicron JN.1 kiba la saphriang stet bha, kynthup ïa ka LF.7 bad ka NB.1.8.
Ka tnat ka koit ka khiah, ka la phah ïa ki nongmuna sha ka National Institute of Virology ha Pune, na ka bynta ban leh ïa ka Genomic Sequencing, ban pynthikna ïa kitei ki jait khñiang jingpang, kiba saphriang kylleng.
U Dr Althaf A, uba dei u nongpeit ïa ki khñiang jingpang bad u Professor ha Government Medical College, Thiruvananthapuram, u la kdew ba kane ka jingkiew kaba mynta ka lah ban don jingïadei bad ka jingduna ka jingkoit jingkhiah jong ki kynhun.
“Ka jinglong jingman kam long kaba sngew shyrkhei. Lada une u khñiang jingpang u long shisha uba lah ban saphriang bha, ngin sa ïohi ïa ki nongpang kiba kham bun namar ka jingbym don ki jingkhanglad. Watla katta ruh, ka long kaba kongsan ban long kiba husiar,” u la ong, da kaba bynrap ba ki jingpang kum ka Leptospirosis, kaba la pynïap ïa 33 ngut ki briew tang mynta u snem, ki dei hok ban ïoh ïa ka jingïarap kaba kham kyrkieh.
U nongpeit bniah ïa ka koit ka khiah, u N C Krishnaprasad, uba la buddien ïa ki jinglong jingman jong u Covid naduh ba la sdang kane ka khlam, u la ong ba ka jingkiew sted mynta ha Asia ka la dep ban poi sha ka kyrdan kaba hakhlieh.
“Ka jingkiew ka la sdang naduh kaba kut jong u bnai Ïaïong ha kylleng ki ri kum ka Thailand, Hong Kong, China bad Singapore, hynrei naduh katei ka por ka la nang hiar. Kaba kongsan ka long ba ym shym la don kano kano ka jingiap ha kito ki thaiñ bad ka jingshah sumar ha ki jaka sumar ka la hiar bha hadien ba la ai dawai ïada”, u la ong.
Ka Myntri ka tnat ka koit ka khiah, ka Veena George, hadien ba ka la pynïaid ïa ka jingïalang jong ka kynhun kaba ju kloi ban ïarap jong ka jylla ha ka sngi Balang, ka la maham ba ka jingma jong ka jingsaphriang jong u Covid ha Kerala ka dang jur bha, khamtam haba ïadei bad ka jingkiew jong ki nongpang dang shen ha kylleng ki ri jong ka Southeast Asia.
Ka jingïalang ka la ai jingmut ban pynjari biang ïa ka jingbthah ban deng mask ha ki hospital bad ban pynthikna ïa ka jingdon jong ki tiar test Covid kiba biang.
