Bengaluru, Jymmang:
U Myntri Rangbah ka jylla u Siddaramaiah ha kine ki khyndiat sngi ba la leit, u la ther ïa ka BJP bad ïa ka mukotduma jong ka halor ka sorkar Congress kaba la neh ar snem da kaba kynnoh ba ki kam pynroi ki la sahkut noh da ka jingpyntreikam ïa ki san tylli ki jingkular. U Myntri Rangbah u la khot ïa ka kum ka song jong ki jingthok bad u la ong ba ki nongïalam ka BJP u BS Yediyurappa, u R Ashoka bad u BY Vijayendra ki la kynnoh khlem nongrim.
Hadien ba la plie ïa ki projek kiba shongdor T. 513 klur ha KR Nagar, u la ong ba ki nongïalam ka BJP bad JDS ki dei ban leit jngoh ïa katei ka sor ban tip la ka sorkar ka la leh ne em ïa ki kam pynroi. Ka BJP ka dei ban tip ba da ki skhim ai jingbit, 50-60 lak ngut ki kynthei ki pyndonkam ïa ki bos ba laitluid man ka sngi bad kumba 500 klur ki kynthei ki la pyndonkam ïa katei ka jaka naduh ba la pyntreikam ar snem mynshwa, u la ong. Hato ka sorkar kaba la troiñ ka lah ban shim ïa ka kam kaba shongdor T.513 klur, u la kylli.
Haba kynnoh ba ka sorkar BJP barim ka la lute ïa ka jylla, u la ong ba ka ai jingbit ïa ki projek kiba shongdor T.2.70 lak klur khlem da mang pisa. U Myntri Rangbah barim u Basavaraj Bommai u la ai hukum ban pyndep ïa ki kam kiba shongdor T.1.66 lak klur ha kaba ka sorkar Congress ka la hap ban siew, u la pynshisha.
Ka jingwan thep vote jong ki saw lak ngut ki briew ha ka jingïalang ha Hosapete kaba rakhe ïa ka jingdap ar snem jong ka sorkar Congress ka long ka sakhi ïa ka jingsynshar kaba bha namar ki briew ki sngewkmen ïa ki jingkular, u la ong. Ka Karnataka, kaba long mynta kaba ar ha ka jinglum GST, kan long kaba nyngkong ha u snem mang tyngka ban wan, u la ong.
