New Delhi, Jymmang:
Ka India ha ka Sngi Saitjaiñ ka la pynrem jur ia ka Pakistan halor ka jingpynphriang khubor lamler haba iadei bad ka ‘Indus Waters Treaty’, kaba la pynsangeh noh da ka India naduh ba khie ka jingiakynad hapdeng ka Pakistan bad India hapoh Jammu & Kashmir. U nongmihkhmat jong ka India sha ka UN- u Parvathaneni Harish, u la ong ba katei ka jingiakut ba 65 snem hapdeng ka India bad ka Pakistan kan sangeh treikam beit noh ia mynta katba ka Pakistan hi kam pat lah ban pynkylla dur ialade haba iadei bad ka jingai jingkyrshan ia ki kam thombor jong ki lehnoh jong ka.
Kane ka jingkren jong u ka long hadien ba uwei na ki nongmihkhmat jong ka Pakistan u la kynthoh ia ka India halor ka jingpynkheiñ noh ia katei ka jingiakut hapdeng ka jing-ialang jong ka United Nations, ha kaba utei u nongmihkhmat jong ka Pakistan u la ong ba ka um ka long ka jingim, ym ka tiar ïakhun na ka bynta ka thma.
Namar la ong ba ka India ka la pynsangeh noh ia ka ‘Indus Water Treaty’, kaba ka la iasoi bad ka Pakistan naduh u snem 1960, hadien shi sngi jong ka jingleit thombor jong ki lehnoh ka Pakistan sha Pahalgam, ha kaba 26 ngut ki nong India ki la shah pyniap dusmon ha kane ka jingjia.
Kumjuh, na ka liang ka India ka la pynsangeh shi syndon ia katei ka jing-iakut ban pyllait ia ka um Indus sha Pakistan bad ka la leit ban kput ruh ia kitei ki ktem lehnoh kiba don ha kylleng ki bynta jong ka ri Pakistan, kum shi bynta ban pynphai kylliang ia ka jingleh donbor bad ka jingleit thombor dusmon jong kitei ki lehnoh Pakistan ia ki paidbah ba lui-lui jong ka India.
U Harish u la ong ruh ba haduh palat 20,000 ngut ki nong India ki la shu iap ei ha ka kti ki lehnoh kiba thrang briew hapoh kine 40 snem mynta.
Dei kane ka daw, kaba la pynbitar shla ia ka India bad ka (India) la hap ban leh eiei noh khnang ba kane ka jingpynibor jong ki lehnoh ka Pakistan kan duh jait noh shi syndon.
Ha u snem 2012, la ong ba ki lehnoh ka Pakistan ki la leit thombor ia ka Tulbul hapoh Jammu & Kashmir bad kane ka la pynjulor bad pyn pulom noh ia katei ka projek Tulbul.
Kumta la ong ba ka India ha kane ka sien ka la pynhiar kput ia ka Pakistan lyngba jong ka ‘Operation Sindoor’, kaba la long ha ka 7 tarik jong une hi u Jymmang, ha kaba ka India ka la leit ban ther bom sha baroh kito ki ktem lehnoh jong ka Pakistan bad ha Pakistan-occupied Kashmir (PoK).
