Hyderabad, Jymmang:
U President ba mynta jong ka seng BRS, u KT Rama Rao, ha ka sngi Saitjaiñ, u la dawa ban iehnoh kam mardor ïa u A Revanth Reddy kum u Myntri Rangbah ka Jylla, hadien ba ka kyrteng jong u, ka la paw ha ka kot mukotduma, kaba la mudui da ka Enforcement Directorate (ED) ha ka mukotduma jong ka National Herald-Young India.
Haba batai ïa kane kum ka “jinglehbeiñ kaba khlem pat ju jia mynno mynno ruh” ïa ka Telangana, u la ong, “Lada u Revanth u dang don kano kano ka jinglong ba janai ne ka akor, u dei ban hiar shuki noh mardor.”
Haba kren sha ki nongthoh khubor ha ka jingïalang bad ki nongthoh khubor ha Telangana Bhavan, u la kynthoh ruh ïa ka jingsngap jar jong ki nongïalam ka BJP ha Telangana, kaba ïapher bak-ly-bak na ka jinglong jong ki paralok jong ki ha Karnataka kiba la kynthoh pathar ïa u nongïalam ka Congress u DK Shivakumar ha kane kajuh ka mukotduma. “Kane ka pynpaw pyrthei ïa ka jingïadei bymkhuid hapdeng ka BJP bad ka Congress ha ka jylla,” la kynnoh u Rama Rao, da kaba buh jingkylli balei ba ka sorkar Modi ka ïada ïa ka sorkar Congress ha Telangana.
U la kynnoh ba ka Telangana ka la kylla long kum ka ATM na ka bynta ki High Command jong ka Congress, da kaba kynnoh ba man la ka por ba ka seng ka donkam pisa, u Revanth u ju pynpoi ïa ki pisa kiba bun ban pynskhem ïa ka kyrdan jong u.
U Rama Rao u la pynpaw ba ha kine ki 17 bnai ba ladep, u Revanth u la leit 44 sien sha Delhi, “ym na ka bynta ka roi ka par jong ka Telangana hynrei ban kyrpad ïa ki nongïalam ka BJP kum u Amit Shah ban ïada ïa u na ki jingshah kynnoh bamsap”. U la bynrap ba watla kam shym la sdang ïa kano kano ka projek thymmai ne pyntreikam ïa ki skhim jingïarap, hynrei ka jylla ka la don ka ram kaba T.1.8 lak klur hapoh ka jingïalam jong u Revanth. “Shano kane ka pisa kan leit?” u la kylli. U Rama Rao u la kynthoh ruh ïa ka BJP ba ka ïada ïa ki nongïalam Congress ba bamsap ha Telangana lyngba ki jingpynbeit rieh jong ka saiñ hima sima. “U Revanth u ïada ïa ki MP jong ka BJP kiba donkti ha ki kam thok jaka, katba ka BJP pat ka siew kylliang da kaba iehnoh ïa ka jingbamsap jong u”, u la kynnoh.
U la ther ïa u Rahul Gandhi, namar ba um shym la buh jingkitkhlieh ïa u Revanth watla u la ïalam ïa ka jingïakhih ha baroh kawei ka ri ban “pynim ïa ka synshar paidbah”. U la pynkut da kaba ong ba ka BRS kan sa ujor shen sha u Lat ban pan jingbit ban pynngat ïa u Myntri rangbah halor ka jingshah kynnoh bamsap.
