Ranchi, Jymmang:
Ka jingktah ha ka sien kaba nyngkong jong ka jingpang COVID-19 ha Jharkhand ha ka jingwan lynshop ha ka sien kaba lai jong ka jingpang ka la long ïa uwei u briew, uba long u nongshna phlim ba pawnam u Lal Vijay Shahdeo. U Shahdeo, uba la pawnam na ka bynta ki jingnoh synñiang jong u sha ka Jhollywood bad Bollywood, u la sam ïa kane ka khubor lyngba ka jingthoh ha ka rynsan Facebook.
U Shahdeo u la pynpaw ba ka jingkoit jingkhiah jong u ka la nang hiar kynsan ha ka 22 tarik u Jymmang katba u dang leit phai sha Ranchi na Mumbai. U la duh bor bad ym tip briew shuh hapdeng ka jingher liengsuiñ bad mar mar la pynkit noh ïa u sha Hospital mar ïa hiar, haba la test ïa u la shem ba u la shah ktah ha ka jingpang COVID-19.
“Kiba la thikna ïa ka jingpang COVID-19 ha India haduh mynta ki long 257 ngut, bad nga ruh nga dei uwei na ki, ha ka 22 tarik, Jymmang, katba nga dang wan na Mumbai sha Ranchi, ngam shym tip briew shuh ha ka por ba nga shong ha ka liengsuiñ, nga dang shah sumar mynta ha Santevita Hospital, kawei na ki Hospital ba bha tam ha Ranchi, hapoh ka jingpeit jong u Dr Mohite Shadera. U la bynrap ba mynta u la kham ïohbor shibun.
U la kyntu ruh ïa kito kiba la ïakynduh dang shen ba kin buddien lada ki don ki dak jingpang kum ka jingpang khlieh, jingpang met, jingshit, jyrhoh, ne jingpang suhkhriat, bad ban leit test mardor. “Ka jingshngaiñ jong phi ka pynthikna ïa ka jingshngaiñ jong kiba ïeid jong phi,” u la pynpaw.
U Shahdeo u la kdew shuh shuh ba, namar ka jingkoit jingkhiah jong u, un ym lah shuh ban pyndep ïa ki kamram kum u dkhot jong ka Jharkhand Film Development Corporation Limited, ha kaba la buh por ba un leit pyni shwa ïa ki katto katne ki phlim.
Ha kajuh ka por, ka India, ka dang sakhi ïa ka jingkiew kaba jem jong ki nongpang COVID-19. Haduh ka 25 tarik, Jymmang 2025, ka tnad ka koit ka khiah jong ka sorkar pdeng ka la pyntip ba ki don 275 ngut ki nongpang ba dang dang don ha ka ri baroh kawei. Kiba bun ki case ki dang long kiba duna bad la pynïaid ïa ki da ki dawai ha ïing. Ym shym la don kano kano ka jingpang kaba jur, hynrei ki bor synshar ki la kyntu ban bteng ban peitngor.
Katkum ka jingtip na ka tnad ka koit ka khiah, la ïohi ïa ka jingkiew suki suki jong ki nongpang ba dang shitom hapdeng ka 12 bad 19 tarik u Jymmang. Ka Kerala mynta ka dei kaba bun eh ki nongpang thymmai kiba dang don haduh 95 ngut, bud sa ka Tamil Nadu kaba don 66 ngut, bad ka Maharashtra kaba don 56 ngut.
Wat la ka jinglong jingman ka dang don hapoh ka jingpynïaid, hynrei ka tnad ka koit ka khiah jong ka sorkar pdeng ka la ai jingmut ïa ki paidbah ban bud ryntih ïa ki lad jingïada ba kongsan kynthup ban deng ïa ki Mask ha ki jaka ba bun briew, ban sumar ïa ka jingkhuid kti man ka por, bad ban kiar na ki jingleit jingwan khlem da donkam lada don ki dak ki shin.
