Bengaluru, Jymmang:
Ka BJP ka la beh seng ïa ki MLA kiba kynthup ïa u ST Somashekar bad u Shivaram Hebbar namar ki kam pyrshah seng. Baroh ar ngut la ïohi ba ki kyrshan ïa ka Congress wat la ki shah jied da ka tiket jong ka BJP. Ka kynhun jong ka Karnataka jong ka Bharatiya Janata Party ha ka sngi Ba-ar ka la beh noh ïa ar ngut ki MLA namar ki kam pyrshah seng.
Katkum ki jingtip ba bniah, ki la shah beh noh na ka seng na ka bynta hynriew snem. Baroh ar ngut ki MLA ha kaba sdang ki dei shibynta jong ka kynhun kieng atiar kaba don ka bynta kaba kongsan ha kaba pynkhyllem ïa ka sorkar synrop jong ka Congress-JD(S) ha u snem 2019 da kaba phet sha ka BJP.
Hynrei ha kine ki bnai ba la dep, la ju ïohi ïa ki ba ki leit sha ki jingïalang ba la ïalam da ka Congress bad ki pynpaw pyrthei ïa ka jingkyrshan ïa ka seng kaba bat ïa ka jingsynshar ha Karnataka.
Ha ka jingthoh sha u Hebbar, ka tnad jong ka BJP ha Karnataka ka la pynpaw ba ka la pynmih ïa ka jingpynbna ban pynpaw ïa ka daw sha u MLA ha ka 25 tarik u Lber bad ba ka la pyrkhat ïa ka jubab jong u halor ka “jingïai pynkheiñ ïa ka aiñ jong ka seng”.
“Katkum kane la rai ban beh noh ïa phi na ka bynta hynriew snem da kaba treikam mardor na ka jinglong dkhot ba kongsan jong ka seng bad phi ïeng ban shah weng noh na kano kano ka kyrdan jong ka seng kaba phi bat haduh mynta,” la ong ka jingthoh ba la phah.
