Bhubaneswar, Jymmang:
Ha kaei kaba lah ban wan kum ka jingpyntngen kaba khraw na ka bynta ki nongthied ïing kiba kwah ban thied ïing hapdeng ka jingkiew dor jong ki jaka ha ka nongbah, ka sorkar jylla ka thmu ban shna bad ai ïing sha ki briew ha ka dor kaba rem dor kaba T.15 lak haduh T.50 lak.
U Myntri ka Housing and Urban Development (H&UD), u Krushna Chandra Mahapatra ha ka sngi Saitjain u la ïathuh ha ki lad pathai khubor ba kum shi bynta jong ka jingthmu ‘Greater Bhubaneswar and Better Bhubaneswar’, ka sorkar ka thmu ban shim ïa ki projek shna ïing ha kane ka nongbah ha kaba yn ai ïa ki ïing sah sha ki briew ha ka dor kaba rem bha.
“Mynta, kawei ka ïing ha ka nongbah jong ka jylla ka shongdor ym duna ïa ka 1 klur tyngka. Ngi dang thmu ban ai ia ki kyrdan bapher bapher jong ki ïing LIG (kiba duna ka ïoh ka kot) bad MIG (kiba pdeng ka ïoh ka kot) sha ki briew kiba don hapdeng ka jinglut kaba T.15 lak haduh T.50 lak. Ka tnad H&UD ka dang trei ïa kane ka plan kaba bniah,” la ong u Mahapatra.
U la ong ba ka jingbun briew kaba nang kiew ha ka nongbah ka wanrah ïa ka jingduna jaka ha ka nongbah bad ka buh ïa ka jingkit kaba khia ïa ki jingtei paidbah. “La shim ïa ki sienjam ban pynïar ïa ka thaiñ nongbah lyngba ka jingpyntreikam ïa ki skhim shna sor. Ki skhim ba la pyntreikam da ka Bhubaneswar Development Authority (BDA) kin pynïar ïa ki sawdong sawkun jong ka sor kaba ailad ïa ki briew ban thied ïing ha ka dor kaba ki kot bor”, u la ong.
U Myntri u la ong ba ki dang trei ruh ïa ki plan na ka bynta ban pynduna ïa ka jingkhapngiah ha ka nongbah.
“Ki jingtyrwa ban shna ïa ki jingkieng jrong ha ki jaka ïakynduh ba kongsan ban pynduna ïa ka jingkhapngiah ki dang don ha ka jingpyrkhat. Ngin sa pynïaid ruh kham bun ki bos sor ban pynbha ïa ka rukom leit jingleit paidbah jong ka nongbah,” u la bynrap.
U Mahapatra u la ban jur ba ka sorkar ka dei ban pynleit jingmut ha kaba pynbha ïa ki jingtei jong ki nongbah kiba stad.
“Ki projek Smart City kiba la pyntreikam kham mynshwa kim shym la seisoh satia. Ngi dang trei ban pynbha ïa kine ki jingtei bad ban pynlong ïa ki kiba treikam”, u la ong.
