Patna, Jymmang:
Ki pulit jong ka Bihar ki la buh ka jingmaham jur ha ki distrik kiba don ha khappud jong ka India bad ka Nepal, ha ka sngi Ba-ar, hadien ba la ïohi ïa ki 15 haduh 20 tylli ki Drone, kiba rung sha ki lynti suiñ jong ka India, na Nepal, ha ka miet jong ka Lah Sngi U Blei.
Kine ki Drone ki her kumba sawphew minit eiei ha ki jaka ba hap hapoh ka Kamla Border Outpost (BoP) ha Madhubani distrik shwa ba kin wanphai biang sha Nepal.
U Deputy Commandant ka Sashastra Seema Bal (SSB) u Vivek Ojha u la pynthikna ba “15-20 tylli ki tiar kiba long kum ki Drone la ïohi ba ki her ha suiñbneng ha ki jaka ba hap hapoh ka ktem pulit khappud jong ka Kamla ha ka por kumba 7.30 janmiet ha ka lah sngi u Blei. Kine ki la leit phai biang sha Nepal hadien ba ki la leit sha ki bynta ba shaphang Sepngi bad Mihngi. Kine ki la rung ha ki lynti suiñ jong ka India bad leit phai biang sha ki bynta ba shaphang Shatei jong ka Nepal.”
U Ojha u la bynrap shuh shuh ba ki briew jong ka SSB kiba la buh ha Janki Nagar BoP ki la ïohi ïa ki tiar katba ki dang wanphai sha Nepal. “Ki heh ka SSB ki la pyntip mar mar sha ki rangbah jong ki, kiba, ha kajuh ka por, ki la pynpoi ïa ka khubor sha ki heh ha ki Station shipai Darbhanga bad Delhi Air Force”, u la ong. Hadien kane, ki bor synshar ki la pynbna ïa ka jingmaham kaba jur bha ha shilynter ka khappud International Border (IB).
Ka SSB ka la kylli jingkylli ruh ïa ki heh pahara na Nepal ha kaba ïadei bad kino kino ki jingïalehkai ba man ka por ban pynher Drone, hynrei la ïathuh ba ki la kyntait ba ki la pynlong ïa kum kane ka kam. “Ka jinglong ba thikna bad ka jingthmu jong ki Drone ka dang don hapoh ka jingtohkit”, la ong u Deputy Commandant Ojha ha uwei na ki nongthoh khubor lyngba ka phone.
U Rakesh Kumar uba dei u Station House Officer (SHO) jong ka Galgalia Police Station u la ïathuh ba la pynlong ïa ka jingkhynra kaba jur ha ki jaka khappud. “La pynlong ïa ka jingpahara kaba pyrkhing bha bad ki briew kiba wan na Nepal ki shah tohkit na ka bynta ki daw jong ka jingïada,” ong u SHO bad bynrap ba la pyntreikam ïa ki shipai sma dien bad khmih bniah lyngba ki Machine.
U la kdew shuh shuh ba la ai jingbthah ïa ki briew kiba pahara ban pynlong ïa ka jingpeit bniah ïa ki kali kiba rung sha ka jaka jong ka ri India na Nepal. “Ka jingpahara ha khappud India-Nepal ka la nang jur hadien ka Operation Sindoor”, u la ong. “La pyntreikam ruh ïa ki pulit kiba phong da ki riam paidbah ban buddien ïa ka jingïaid lynti jong ki briew kiba la shah suba.”
Ka 48th Battalion jong ka SSB ka la don ha Madhubani distrik, kaba don lang ha khappud bad ka Nepal. U Vivek Ojha ula long kum u Deputy Commandant jong ka kynhun shipai.
Ha kajuh ka por, u Director General of Police ka Bihar u la khot ïa ka jingïalang jong baroh ki Inspector General (IG) bad ki Deputy Inspector General (DIG) ha ophis treikam jong ki pulit ban bishar bniah ïa ka suk ka saiñ hashwa ka ilekshon sha ka ïingdorbar thawaiñ kaban sa wan. Ïa kane ka jingïalang la shim ba ka long kaba kongsan hadien ka jingkiew kynsan jong ki kam runar ha kylleng ka jylla.
