New Delhi, Jymmang:
Ka Election Commission of India (ECI) ha ka Lah Sngi U Blei, ka la pynbna ïa ka por ban pynlong ïa ka jingthep vote kaba shisien ar snem sha phra tylli ki Rajya Sabha Seat na Tamil Nadu bad Assam. Ka jingthep vote ïa kane kajuh kan long ha ka 19 tarik, Jylliew bad ïa ki nongjop yn pynbna ha kajuh ka sngi.
Kane ka ilekshon kaba shisien ar snem ka long namar ba ka samoi treikam jong phra ngut ki dkhot jong ka Council of States (Rajya Sabha), kiba mihkhmat ïa ki ar tylli ki jylla, kan kut noh hapdeng u bnai Jylliew bad Naitung, ong ka kynhun ba dei khmih halor ka ilekshon ha ka jingthoh ba la phah.
Na Assam, ar tylli ki seat kin sah thylli noh da ka jingshongthait jong u Mission Ranjan Das bad u Birendra Prasad Baishya, kine baroh ar ngut kin hiar shuki ha ka 14 tarik, Jylliew.
Ha Tamil Nadu, ki don hynriew ngut ki dkhot jong ka Rajya Sabbha, kiba kynthup ïa u Anbumani Ramadoss, u M Shanmugam, u N Chandrasegharan, u M Mohamed Abdulla, u P Wilson bad u Vaiko, kiban shongthait noh ha ka 24 tarik, Naitung.
Katkum ka kyrwoh jong ka ECI, ka jingpynbna ban pynlong ïa ka ilekshon kan long ha ka 2 tarik, Jylliew, katba ka tarik ba khatduh ban thep kyrteng kan long ha ka 9 tarik, Jylliew. Ka jingbishar bniah ïa ki kyrteng kan long ha ka 10 tarik, Jylliew bad ka tarik ba khatduh ban weng ïa ka jinglong kyrtong kan long ha ka 12 tarik, Jylliew.
Ha ka jingpynbna, ka ECI ka la pynksan ban pyndonkam tang da ki khulom Violet Sketch jong ka jingpynbeit ba la buh lypa, ba la pynbiang da u Ophisar Thep Vote, na ka bynta ban buh dak ïa ki jingsngewtynnat ha ka kot thep vote. Yn ym shah ban pyndonkam ïa kino kino kiwei pat ki khulom ha kano kano ka jinglong.
Ban pynlong ïa ka ilekshon kaba laitluid bad kaba beit, ka poll panel ka la ong ba yn thung ïa ki nongpeitkai ban buddien bha ïa ka jingpyntreikam ha ka ilekshon.
