Lucknow, Jymmang:
Ka kynhun ba ïatreilang jong ki pulit ka Uttar Pradesh bad ki pulit jong ka Delhi ki la ïoh ban siat ïap ïa uwei u nongsiat jong ka kynhun runar ba pawnam jong ka kynhun Lawrence Bishnoi ha ka jingïasiat ha ka thaiñ Hapur Kotwali, la ïathuh ki heh sorkar ha ka sngi Palei.
Utei u briew uba la khlad noh, u dei uba la tip kyrteng kum u Naveen Kumar, uba la thwet ha kiba bun ki kam, kynthup ïa ka kam pynïap briew bad hapoh ka Maharashtra Control of Organized Crime Act (MCOCA), ong uwei u heh pulit.
U ADGP (STF) u Amitabh Yash, ha ka kyrwoh, u ïathuh ba ha ka miet jong ka sngi Balang, ka kynhun ïatreilang jong ka Noida unit jong ka STF bad ka Delhi Police’s Special Cell, ki la ïasiat bad ki riew sniew ha ka thaiñ Hapur Kotwali, ha kaba u Kumar, u la mynsaw jur.
La rah ïa u Kumar sha kawei ka jaka sumar, ha kaba ki doktor ki la pynbna ba u la khlad noh, ong u ophisar. U nongshong shnong jong ka Loni ha Ghaziabad distrik, u Kumar, u dei u nongsiat uba trei shitom jong ka kynhun runar Lawrence Bishnoi, uba la ïatreilang bad u dkhot jong ka kynhun runar, u Hashim Baba, ong u ADGP.
Haduh 20 tylli ki mukotduma, kiba kynthup ïa ka kam pynïap briew, ka jingthmu ban pynïap briew, ka kam rahbor, ka kam lute bad hapoh ka MCOCA, la ujor pyrshah ïa u Kumar ha Delhi bad Uttar Pradesh, ong u ophisar.
U Kumar u la shahkem nyngkong eh ha thanat Seemapuri ha Delhi katkum ka Arms Act ha u 2008. Ha u snem 2009 la kynnoh ba u la leh ïa ka kam pynïap briew ha ki jaka jong ka thanat Sahibabad, la ong u ophisar bad bynrap ba u la shah kem hapoh ka aiñ Gangster Act ha Uttar Pradesh ha u snem 2010.
