New Delhi, Jymmang:
Ki shipai pahara ki la kem ïa ar ngut ki lehnoh nongïarap jong ka Lashkar-e-Taiba (LeT) ha Shopian distrik ha Jammu & Kashmir.
Kine ki lehnoh kiba ju ïarap kim dei kiba don ha ka thup kyrteng jong ka kynhun ki lehnoh, hynrei ki shu long tang ki nongïarap ban leh ïa ki kam pyntriem na ka bynta kano kano ka kynhun lehnoh bad hadien ba ki la dep ban leh ïa ki kam pyntriem ki im kumba long ki riewpaidbah.
Katkum ka kyrwoh ba la pynmih da ki pulit, kitei ar ngut ki lehnoh ki dei ba la tip kyrteng kum u Irfan Bashir bad u Uzair Salam.
La kem ïa ki hadien ba ki bor pahara ki la pynlong ïa ka jingkhang kdong bad ka jingkhynra ha ka miet jong ka sngi Balang ha ka thaiñ Baskuchan jong ka Poonch.
Na kine ki lehnoh la ïoh kurup ruh ar tylli ki suloi AK-56, saw tylli ki Magazine, 102 tylli ki kuli (7.62x39mm), ar tylli ki bom kawang kti bad ar tylli ki pla rit.
“La ker kut bha ïa katei ka jaka bad la ïohi ïa ka jingïaid jong ki lehnoh ha kawei ka kper soh kaba don hajan. Ka jingleh kaba stet bad kaba stad da ki shipai ka la pynlong ïa ki arngut ki nongïarap jong ka kynhun LeT ban aiti noh da kaba jop, kaba la khanglad ïa ka jingïasiat kaba lah ban jia,” la ong ki heh sorkar ha ki lad pathai khubor.
Ki heh sorkar ki la bynrap ba la ujor ejahar pyrshah ïa kitei ki arngut bad la pynlong ruh ïa ka jingtohkit kaba bniah halor kane ka kam.
Ki pulit ki don ka jingkyrmen ba hadien ka jingtohkit kaba bniah, na kine kiba la shahkem, kin sa don shuh shuh kiwei pat ki nongïarap bad ki dkhot jong ka seng ki ban sa shahkem khamtam ha ki bynta ba bun jong ka distrik bad ki bynta jong ka Jammu & Kashmir.
