New Delhi, Jymmang:
Ha ka jingpyntreikam kaba shlur jong ka jinglong nongïalam bad ka jingleit shabar, u Myntri Rangbahduh ka ri Narendra Modi u la leit jngoh bniah ïa ki katto katne ki jylla jong ka ri India ha baroh u bnai Jymmang mynta u snem, da kaba plie bad buh ïa ki maw nongrim na ka bynta ki jingtei bad ki projek pynroi kiba shongdor haduh T. 2.8 lak klur.
Ki jingleit jong u, khamtam sha ki jylla kum ka Bihar, ki la pynïasoh tbit ïa ka jingsynshar bad ka jingpynbna khubor saiñ hima-sima ha ka jingïaid lynti jong ka ilekshon ba la buh mynta u snem, kaba la pynpaw ïa ka jingangnud jong ka sorkar jong u na ka bynta ka roi ka par kaba kynthup lang bad ka jinglong ba skhem jong ka pyrshah ïa ki kam lehnoh.
U Myntri Rangbahduh ka ri, u la pynlut ar sngi marwei ha Gujarat bad ha Bihar, kaba don ha ka jingthep vote, ha ka por ba u leit jngoh shisngi sha Uttar Pradesh, Rajasthan, Punjab, Sikkim, Madhya Pradesh, bad West Bengal.
Ha kawei pa kawei na kine ki jylla, u la ai jingkren ha ki jingïalang paidbah kiba heh bad ai ki jingkren kiba donbor, da kaba pynkynmaw beit ïa ka Operation Sindoor kaba dang shu dep pynkut, ka jingleh pynrem jong ka India hadien ka jingshah thombor ha Pahalgam ha u bnai, Ïaïong kaba la shim ïa ka jingim jong ki 26 ngut ki riew paidbah.
Ka phang kaba ju wan bad kaba donbor ha kine ki jingleit jngoh ka long ka jingpynksan jong u ïa ka jingjop jong ka Operation Sindoor, kaba u la ïaroh kum ka dak jong ka “jinghikai thymmai” jong ka India halor ki kam lehnoh.
