Chennai, Jymmang:
U khlur ak phlim u Kamal Haasan, 70 snem ka rta, na ka Makkal Needhi Maiam (MNM), u la khreh ban rung sha Rajya Sabbha, da ka jingai burom jong ka seng ba la ïatreilang bad ka seng kaba bat ïa ka jingsynshar ha Tamil Nadu, ka Dravida Munnetra Kazhagam.
Ka DMK ha ka sngi Balang ka la pynbna ïa ki kyrtong ban ïakhun ïa ka ilekshon kaba shisien ar snem ha ka 19 tarik u Jylliew sha Rajya Sabha da kaba pynïeng kyrtong biang ïa u heh nongïasaid aiñ u P Wilson bad pynbna kyrteng ïa ki dkhot ka seng u Salma, (u myllung) bad u S R Sivalingam (u Myntri barim), u Myntri Rangbah bad u President ka DMK u M K Stalin ha ka kyrwoh khubor.
Ïa ka shuki kaba saw la ai sha u Makkal Needhi Maiam (MNM) kumba la ïakut ha ka ilekshon Lok Sabbha mynshem snem. U heh ka MNM uba dei ruh u khlur ak phlim u Kamal Haasan un long u nongmihkhmat, ong ka kyrwoh jong ka MNM.
Ka kynhun synrop ba la ïalam da ka DMK, ka Secular Progressive Alliance (SPA) ha Tamil Nadu, ka don ïa ka jingkhlaiï kaba 159 ngut ki dkhot jong ka ïingdorbar thaw aiñ ha ka ïing dorbar kaba don 234 ngut ki dkhot. Ban ïoh ïa ka shuki ha Rajya Sabbha, u nongmihkhmat u donkam 34 vote.
Halor ka jingkhlaiñ jong ka jingkheiñ ha ka ïingdorbar, ka DMK kan jop saw tylli na ki hynriew tylli ki jaka ha kaba la buh ban jied ha ka 19 tarik u Jylliew, kaba pynlong ïa ka jingrung jong u Kamal Haasan sha RS.
Ïa une u khlur ak phlim la kular ïa kane ka shuki hadien ba ka MNM ka la pynïasoh bad ka DMK ha Tamil Nadu ha u Lber, 2024 shwa ka ilekshon Lok Sabha bad u la ïalap ilekshon na ka bynta ka INDIA bloc jong ki seng pyrshah.
U Wilson u dei u nongpynkheiñ aiñ jong ka DMK uba la lamkhmat ïa ki katto katne ki mukotduma ha ka ïingbishar bahakhliehduh jong ka Madras bad ka ïingbishar bahakhliehduh kynthup ïa ka jingïasaid ha ka mukotduma pyrshah ïa u Lat ka TN u R N Ravi ban pynslem ïa ki bill kiba la pynlong ïa ka ïingbishar ba hakhliehduh ban pynmih ïa ka rai kaba kongsan ha ka 8 tarik, Ïaïong kaba buh por ïa ki bill jong ki Lat jong ka jylla bad ïa ka President ka ri India.
Ka liangpyrshah ka AIADMK kaba la ïalam da u Edappadi Palaniswami ka don 62 ngut ki MLA bad la khmih lynti ba kan pynbna arngut ki kyrtong da ka jingkyrshan jong ka BJP kaba don saw ngut ki MLA.
Ka AIADMK bad ka BJP ki la ïakren ha u bnai, Ïaïong ban ïakhun lang ïa ka ilekshon sha ka Ïingdorbar Thawaiñ jong u snem 2026 hadien ba ki la ïakhlad noh haduh 19 bnai, watla ym shym la lah ban tip satia la u K Annamalai, u heh barim jong ka BJP, bad u briew uba la shim ba u dei uba donkti ha ka jingïakhlad hapdeng jong ka bad ka AIADMK.
Ka samoi treikam jong ki 6 ngut kiba shong mynta ha ka ïingdorbar bahakhliehduh kan kut noh ha u bnai Jylliew. Kitei ki long u M M Abdullah (DMK), u N Chandrasegharan (AIADMK), u Anbumani Ramadoss (PMK, u paralok jong ka NDA), u M Shanmugam (DMK), u Vaiko (MDMK, ka seng ba la ïatreilang bad ka DMK) bad u Wilson (DMK).
U Haasan u ngat ha ka jingïaknieh halor ka ktien hadien ba u la ong ba “ka ktien Kannada ka dei kaba la kha na ka Tamil” ha ka jingpynlait Audio ha Chennai ïa ka phlim bathymmai jong u -Ka ‘Thug Life’ jong u Mani Rathnam kaba la pynmih lang da ka Red Giant Movies- kaba la khlieh da u Myntri Rangbah ka jylla Udhayanidhi.
“Ka Kannada, ka don ïa ka histori kaba la slem bha”, la ong u Myntri Rangbah ka Karnataka, u Siddaramaiah, katkum ka khubor jong ka lad pathai khubor. “U Kamal Haasan bapli um shym tip ïa kata.”
Hadien ka jingpynrung kyrteng jong u Haasan, u khun jong u Stalin bad u Symbud Myntri Rangbah ka Tamil Nadu u Udhayanidhi Stalin u la thoh ha ka rynsan X, “…Yn sa ïohsngew ïa ka sur jong u Kamal na ka bynta ki hok jong ka Tamil Nadu bad ban ïada ïa ka Riti Synshar jong ka ri India bad ïa ka jinglong bapher bapher jong ka ri.”
Haba kynthoh halor ka jingïakynad halor ka ktien, u Haasan u la ong, “Ki nongsynshar kynthup ïa nga kim tip bha ban kren shaphang ka ktien. To ngin iehnoh ïa kata ha ki nongthoh histori, ki nongwad bniah ïa kiei kiei kiba rim bad ki riewstad shaphang ka ktien.”
U la ong ba ka jingkren jong u ka dei namar ka jingïeid haba kren bad ka aktor Kannada ka Shivanna. Halor ka jingïeng RS jong u, u Haasan u la kynthoh ha ka ktien Malayalam.
“Yn sa ïohsngew ïa ka sur jong phi (ki paidbah) la ka dei ka Tamil, Malayalam, Kannada ne Telugu ne Hindi. Ka sur jong ki briew ka long kaba kongsan, ym ka ktien.”
La seng ha u snem 2018, ka MNM ka la ïakhun ha ka ilekshon Lok Sabha 2019 bad ha ka ilekshon Tamil Nadu 2021 dalade hynrei ka la ïoh ïa ka jaka kaba thylli ha baroh ar tylli ki jingïakhun ilekshon.
U Haasan u la kular ban long ka lad kaba thymmai ha ka saiñ pyrthei jong ka TN hynrei ka seng jong u ka la jop tang 3.7% ka bhah vote, kaba kham bun na ki jaka sor, ha ka ilekshon LS 2019 bad ka jingtreikam jong ka ka la nang hiar shuh shuh ha ka ilekshon jylla jong u snem 2021 haba ka bhah vote jong ka ka la hiar sha ka 2.5% .
U Haasan, u la ïaid ruh ryngkat bad u Rahul Gandhi, President barim ka Congress, ha ka por ba u ïaid na shaphang Shathie shaduh Shatei jong ka Bharat Jodo Yatra ha u snem 2022-23.
