New Delhi, Jymmang:
U Chintan Raghuvanshi, Deputy Director jong ka Enforcement Directorate (ED) u la shah kem ha ka Central Bureau of Investigation (CBI), ha kaba sdang u la dawa T.5 klur tyngka na uwei u heh spah uba sah ha Bhubaneswar na ka bynta ban pynbeit ïa ka mukotduma thok pisa kaba la buh jingmudui pyrshah ïa u, hynrei hadien pat u la pynbeit da kaba ai pisa T,200 klur kum ka jingpynbam pisa, la ong ka jingmudui ejahar ba la buh da ka kynhun CBI halor ka jingjia.
Uwei u heh jong ka ED u la ong ba ka tnad jong ka sorkar pdeng kan sdang ruh ïa ka jingpynshitom pyrshah ïa u Raghuvanshi bad ka lah ban tohkit ïa u halor ka jingkamai ïa ka spah bymhok lada ka jingtoh-kit jong ka CBI ka pynpaw ba u la ïoh pisa thok ha ki por ba la dep bad u la pynmih pisa na ki kam runar.
U Raghuvanshi u la shah kem ha ka CBI ha ka por janmiet jong ka sngi Palei hadien ka jingujor jong u Ratikanta Rout, heh spah uba don ka kam tih maw bad pynkhyllem maw ha Dhenkanal.
Katkum ka ejahar ba la bishar bniah da ka lad pahtai khubor, la ong ba u Ratikanta Rout u la ai ïa ka jingmudui ejahar halor ka jingkynnoh bamsap sha ka kynhun CBI ha ka 28 tarik, Jymmang.
Ka jingujor jong u Rout, kaba dei shi bynta jong ka ejahar, ka ong ba u la ïoh ïa ka jingkhot hajir na ka ophis jong ka ED ha Bhubaneswar ha u snem 2024 bad u la ïoh jingtip ba la buh jingmudui ïa ka jingjia thok pisa pyrshah ïa u da ka ED. La pynlong ruh ïa ka jingkhynra ha ka jaka jong u ha ka 8 tarik, Kyllalyngkot, 2025.
U Rout u la ong ha ka jingujor ba u la shah khot biang sha ophis ED ha u bnai Lber mynta u snem. Ha kane ka jingleit jngoh, u Raghuvanshi, u la khot ïa u Rout, sha ka kamra jong u bad u la ong ïa u, ba un ïakynduh ïa u riew shimet, u Bhaghti, lada u kwah ïa ka jingpyllait ha katei ka jingshah kynnoh.
U la bynrap ruh ba u Bhaghti u la ïathuh nyng-kong ïa u halor ka jingdawa T.5 klur hadien ka jingïakren bad ka Raghuvanshi.
U Rout u la bynrap ba halor ka jingkyrpad jong u lyngba ka jingkhot FaceTime, u ophisar ka ED u la mynjur ban pynduna ïa ka pisa sha ka T. 2 klur.
U Rout u la ïathuh ba la bthah ïa u ba un siew T.50 lak, ka bynta ba nyng-kong jong ka jingphah siew pisa kaba T. 2 klur ban pynbeit ïa ka mukotduma, bad ban ym kem ïa u.
U Raghuvanshi, uba dei u ophisar jong ka Indian Revenue Service (Customs and Indirect Taxes) batch 2013, u la shah kem ha ka jingthwet bad jingbuddien jong ka CBI.
