Bengaluru, Jylliew:

Ka Sorkar Karnataka ha ka sngi Thohdieng, ka la khang syndon ïa ki jaka die duma, ki jaka ïadih duma (Hookah bar) bad ka la pynkiew ïa ka rta kaba long aiñ ban thied ïa ki duma, na ka 18 sha ka 21 snem, bad ka la pynkiew ïa ka kuna kaba heh tam, na ka bynta kiba pynkheiñ ïa ki kyndon aiñ ban tehlakam ïa u duma, na ka T.200 sha ka T.1,000.

Ka hukum jong ka sorkar kaba pyntip ïa ki jingkylla, ka la mih ha ka sngi Thohdieng, hadien ba ka President Droupadi Murmu, ka la ai ïa ka jingmynjur jong ka, ïa ka jingpynkylla kaba kyrpang jong ka Karnataka, ïa ka aiñ ban pyrkhing ïa u duma, ha ka 23tarik, Jymmang.

Ka aiñ ba la pynkylla thymmai – Ka Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) (Karnataka Amendment) Act, 2024 – la pynmih ha Karnataka Gazette ha ka 30 tarik, Jymmang.

Kane ka jingpynkylla ka treikam ha ka Central COTPA Act, 2003 bad ka pynlong ïa ka ban kham pyrkhing ha ka jingpyntreikam jong ka hapoh ka jylla Karnataka.

Hapoh ki kyndon thymmai, la bujli ïa ka Section 4 jong ka aiñ ban ong ba la khang pyrshah ïa ka “jingpyndonkam” ïa ki jait duma ba la pynmih- kynthup ïa ka jingdih duma bad ka jingbiah pathar ha kano kano ka jaka paidbah.

Hynrei ka aiñ ka pynshai ba ha ki hotel kiba don 30 tylli ki kamra ne palat, ki jaka bam kiba lah ban shong 30 ngut ne palat, bad ha ki kad liengsuiñ, lah ban pynbiang ïa ka jaka dih duma kaba la buh kyrpang.

Ka jylla, ka la wanrah da ka Section 4A kaba thymmai, kaba khang ban plie ne pynïaid ïa ki jaka dih duma ha kano kano ka jaka ha Karnataka.

La pynkylla ruh ïa ka Section 6 jong ka aiñ. Mynta la khang pyrshah ban die sikret ne kiwei kiwei ki jait duma sha kino kino kiba hapoh 21 snem ka rta.

Kane ka aiñ ka pyrkhing khamtam ïa ki nongdie kiba ju shim kabu bad ban kamai tam ban die sha kiba hapoh rta.

Ka kuna ba la buh ïa kiba pynkheiñ ïa ki kyndon aiñ mynta ka long T.1,000.