Thiruvananthapuram:
Da ki spah ngut ki briew ki la shah pynkynriah sha ki jaka ai jingïada ba shipor na ki jaka them jong ka Kerala katba ka jingshlei um ka la rung sha ki ïing jong ki ryngkat bad u slap bajur katta katta ha ka jylla.
Ki surok ki la shlei um bad kane ka la buh jingeh shibun ïa ki briew bad ki shnong ba marjan ha ki distrik ba don ha ki bynta ba shaphang Shatei jong ka jylla ki ïakynduh jingeh.
Ki nongshong shnong ki la ong ba ki wah ki lak shlei bad ki shnat wah ba bun ki la long ka daw ban pynshlei um ïa ki thaiñ kiba don ha ki jaka them.
Ha Kasaragod, ka wah Madhuvahini kaba la tuid ka la rong noh ïa ki surok bad ka la pynshlei ïa ki ïing ha kiba bun ki jaka.
Ki briew ki la hap ban kiew noh sha ka mala kaba hajrong naba ka mala kaba ha trai duh ka la shlei um.
Ka jingshlei um ka la jur bha ha ka distrik Kozhikode bad Kannur bad kumjuh ka jingbteng jong ka jinghap jong u slap uba jur ka la wanrah ïa kiba bun ki jingeh.
La ïohi ïa ki lieng rit ba la teh hakhmat jong kiba bun ki ïing ha Payyannur ha Kannur.
Ki briew ki la shah pyllait im na kiba bun ki thaiñ ba la shlei um hapdeng kane ka por ba jur ka jinghap slap ha Kannur, Kerala, ha ka sngi Thohdieng.
“Ki lieng ki long kiba la pynkhreh namar ngi tieng ba ngin hap ban leit sha ki jaka ai jingïarap lada ka um shlei um kam hiar,” la ong uwei u tymmen ha kawei ka TV Channel.
La plie shuh shuh ïa ki jaka ai jingïarap ha ki distrik ba Shathie ruh katkum ki jingkheiñ ba la pynmih da ki bor ba dei khmih.
Ki la don kumba 46 tylli ki jaka sah ba shipor ba la plie haduh mynta ha Kottayam distrik bad 1,136 ngut ki briew ki dang sah mynta ha ki, katkum ka jingïathuh ki bor pynïaid ka distrik.
Kawei ka ïing ka la shah tap hadien ba ka um duriaw ka la rung sha ka jaka ba long them hapdeng u slap ba jur bha, ha Kochi bad Kerala.
Ki don haduh 851 ngut kiba sah ha ki 26 tylli ki jaka sah ba shipor ha ka distrik ba marjan ha Alappuzha ha kaba 19 tylli ki ïing ki la shah pynjulor tang ha ka sngi Thohdieng, ong ka khubor ba la pynmih ha ka por miet jong ki bor pynïaid distrik.
Katkum ka jingpynbna kaba thymmai da ka tnad ba dei khmih halor ka jinglong ka mariang jong ka ri India, ka jinghap slap kaba jem ryngkat bad ka lyer kaba jur na sla khyndew ryngkat bad ka jingstet kaba lah ban poi teng teng sha ka 50 km/ph ha ki jingbeh jong ki lyer ka lah ban long ha kawei ne ar tylli ki jaka ha ki thaiñ Thiruvananthapuram, Kollam, Pathanamthitta, Alappuzha, Kottayam, Idukki, Ernakulam, Thrissur, Malappuram, Kozhikode bad Kannur distrik.
