Chandigarh, Jylliew:
Ki pulit ka Punjab ha ka sngi Ba-ar ki la kem ïa uwei u briew uba na Tarn Taran ïa uba la tip kyrteng kum u Gagandeep Singh, namar ka jingkynnoh ba u la sam ïa ki jingtip ba bniah shaphang ki jingïaid lynti jong ki shipai India ha ka por ba don ka Operation Sindoor bad ka kynhun syntiat jong ka Pakistan ka Inter-Services Intelligence (ISI).
U Gagandeep Singh u la ïakynduh ruh ïa u nongïalam ba kyrshan ïa ka Khalistan uba don ha Pakistan, u Gopal Singh Chawla, la ong u Director General of Police u Gaurav Yadav.
“Da kaba pynstet katkum ki jingtip ba la ïohlum na ka Counter-Intelligence-Punjab, ka kynhun pulit jong ka TarnTaran, ha ka jingkhynra lang ka kem ïa u Gagandeep Singh ba la tip ruh da ka kyrteng kum u Gagan, uba shong ba sah ha Mohalla Rodupur, Gali Nazar Singh Wali, ha TarnTaran. Une uba la shahkem u la shah kynnoh ba u la don ka jingïadei kam bad ki kynhun syntiat jong ka Pakistan bad u Gopal Singh Chawla, ha kaba la ai ïa ki jingtip kiba bniah ha kaba ïadei bad ka jingïaid ki shipai ha ka por ba la pynlong ïa ka OperationSindhoor,” la thoh u DGP ka Punjab ha ka rynsan X.
U DGP jong ka Punjab u la ong ba ki jingtohkit ki la pynpaw ba u donkti ha kaba “sam ïa ki jingtip ba la buhrieh”, kynthup ïa ki jingpynkynriah shipai bad ki jaka ba kongsan, kaba buh jingma ïa ka jingshngaiñ jong ka ri.
