New Delhi, Jylliew:
Ki heh nongïalam jong ka Aam Aadmi Party (AAP) kiba kynthup ïa u Manish Sisodia bad u Satyendar Jain ki la shah khot hajir halor ka jingkynnoh ba ki la shna ïa kawei ka kamra klas kaba la kot sha ka T.2 hajar klur da kaba shu bamsap.
Ka Anti-Corruption Branch (ACB) jong ka sorkar Delhi kaba la buh jingujor ha kaba ïadei bad ka mukotduma halor ka kam bamsap pyrshah ïa kine ar ngut ki nongïalam ha ka 30 tarik, Ïaïong, ka la khot ïa u Sisodia, u Symbud Myntri Rangbah barim ka Delhi uba bat ruh ïa ka tnad Education, na ka bynta ban shah tohkit ha ka 9 tarik, Jylliew.
U Jain, uba dei u Myntri jong ka tnad PWD (Public Works Department), ka kynhun jong ka sorkar, kaba pyntrei ïa kum kine ki jingtei, ha ka sorkar ba ïalam da u Arvind Kejriwal, u la shah bthah ban leit hajir hakhmat ki heh sorkar, ha ka 6 tarik, Jylliew.
Ka seng AAP, kaba kam ba ka la pynkylla dur ïa ka “rukom hikai ha Delhi”, bad bun na ki jingïalap ilekshon jong ka, ki long katkum ka rukom ba ka pynbha ïa ki skul bad ki kolej ha kine ki phew snem ba la leit, ka la ong ba ïa ka mukotduma pyrshah ïa ki nongïalam jong ka, la mudui khnang ban lah ban pynbor bad ban pyntieng ïa ki.
Ka ACB ka la kynnoh ba kane ka projek ka kynthup ïa ka jingtei ïa kumba 12,748 tylli ki kamra klas bad ki ïingskul ha kylleng ka Delhi bad ka la ïohi ïa “ki jingbym ïahap pisa kiba jur, ki jingkylla bad ka jingkiew dor”.
Ka kynhun pyrshah bamsap ka la kynnoh ba katei ka jingleh thok ka long kumba 2,000 klur tyngka bad ka kynthup ïa ka jingai kontrak ha ka dor kaba la rem bha, ha kaba la ïathuh ba ki kamra klas ha ki skul ba pynïaid da ka sorkar la shna ha ka dor kaba T.24.86 lak kawei kawei, kaba long haduh san shah ïa ka jinglut kaba ju long.
Kumba la pynshisha, la ong ba ïa kane ka projek la ai sha ki 34 ngut ki kontraktor, bad kiba bun na ki, ki dei kiba don jingïadei bad ka seng AAP.
Ka kynhun ACB ka la kynnoh ba ka jingtei ka kynthup ïa ki jingtei kiba neh shiteng por ne Semi-Permanent Structures (SPS) kiba la khmih lynti ba kin neh haduh 30 snem, hynrei ka jinglut ka ïahap bad ki jingtei kiba la shna jong ka Reinforced Cement Concrete (RCC) sha kaba kine ki ju neh haduh kumba 75 snem.
Ïa ka jinglut jong katei ka projek la pynkiew da T.326 klur khlem da wanrah ïa ki tender kiba thymmai, la ong ka kynhun ACB ha ka kaiphod ba ka la phah.
