Patna, Jylliew:
Ka kynhun Myntri jong ka Bihar ha ka sngi Ba-ar ka la ai ïa ka jingmynjur ban pyndap ïa 4799 tylli ki kam babun ha ki tnad sorkar bapher bapher.
Ki la don baroh kumba 2361 tylli ki kam jong ki kyrdan bapher bapher ha ka tnad pule puthi, bud sa 1350 tylli ki kam ha ka tnad Urban Development and Housing Department.
Ki la don baroh kumba 47 tylli ki rai ba la wanrah ha ka jingïalang jong ka kynhun Myntri ba la pynïaid da u Myntri Rangbah ka jylla u Nitish Kumar.
Ka kynhun Myntri ka la mynjur ïa ka jingtyrwa jong ka tnat pule puthi ban thaw ïa ki 1503 tylli ki kam kiba kynthup ïa 568 tylli ki kam Education Development Officer bad 935 tylli ki kam Assistant Education Development Officer hapoh ka Bihar Education Administrative Cadre Rules 2025, la ïathuh u Additional Chief Secretary (ACS) u S Siddhart ha ka jingïakren bad ki nongthoh khubor ha ka por ba la batai bniah ha ka jingthoh ba la buh da ka Cabinet.
Ka rai ban thaw ïa kine ki post kan ïarap ban pynlong ïa ka jingpyntreikam na ka bynta ki skul naduh ki Primary haduh ki Higher Secondary khnang ban lah ban pynthikna ïa ka rukom pule kaba paka ha ka jylla, u la ong.
U Assistant Education Development Officer u la pynbna ban ai ïa ki kam ban leit jngoh bad ki jingpynïaid ïa ki skul jong man ki 10 tylli ki skul Panchayat katba u ophisar jong ka Education Development un sa pynïaid ïa ki skul ha ki Block.
Kumba la buh jingthoh, la ong ba ki la don kumba 8053 tylli ki Panchayat katba 534 tylli ki Block ha ka jylla. Ka la thaw ruh haduh 818 tylli ki kam na ka bynta ka Bihar State Educational Infrastructure Development Corporation Ltd.
Nalor kane, la thaw ar tylli ki kam jong ki Estate Officer bad 38 tylli ki post Assistant Estate Officer na ka bynta lai snem katkum ka jingïateh kular. Ka kynhun Myntri ruh ka la ai ruh ïa ka jingtyrwa jong ka tnad Urban Development and Housing ban thaw 1350 tylli ki kam na ka bynta ban pynïaid ïa ki ophis ba la thaw hapoh ka Planning Area Authority haman la ki distrik, la ong u Siddharth.
Ka la thaw ruh 653 tylli ki kam na ka bynta ka Bihar State Jeevika Fund Credit Cooperative Federation Ltd, Patna ba la thaw hapoh ka Bihar Cooperative Society Act 1935, ka ACS ka la ong haba bynrap ba la thaw 390 tylli ki kam na ka bynta ka Women and Child Development Corporation na ka bynta ban pyntreikam bha bad ban buddien bha na ka Protection of Women na ka Domestic Violence Act 2005.
Kane ka aiñ ka ren na ka bynta ka jingthaw ïa ki kam jong ki ophisar kiba la ïoh jingïada haman ki distrik khnang ban lah ban pyntikna ban lah ban ai jingïada sha ki kynthei kiba ïakynduh jingeh ha ka por ba ki ju leit trei ne bylla ïing briew.
Ïa kine ki ophisar yn thung ha ka State Headquarter Level (corporation)/ district/ sub-division.
Ka kynhun Myntri ka la ai ruh ïa ka jingmynjur ban thaw 15 tylli ki kam ha ka tnad General Administration katba 28 tylli la thaw na ka bynta ban nangpynïar bad pynkhlaiñ ïa ka tnad Public Health Engineering (PHED).
Ka kynhun Myntri ka la pynduna ruh ïa ka dor jong ka khajna VAT na ka 29 percent sha ka saw percent ïa ka umphniang Aviation Turbine Fuel (ATF), u la ong da kaba bynrap ba kane ka sienjam kan pynlah ïa ki liengsuiñ ban theh bad pyndap umphniang ha Patna.
Kan pynbun ïa ka jingdon jong ki liengsuin bad kan pynlong ïa ka jylla ban ïatynjuh bor bad ki jylla ba marjan.
Ka la ai ruh ïa ka jingmynjur ïa ka jingtyrwa jong ka tnad Urban Development and Housing Department ban pynïar ïa ka thaiñ jong ki Municipal Council jong ka Phulwarisharif, ka Danapur Nizamat bad ka Khagaul ha Patna distrik. Kan pynlah ïa ki nongshong shnong ban ïoh ïa ki jingdonkam ba la pynbiang da ki bor shnong ba dei khmih ïa ki jaka sor.
Nalor kane, ka jingpyntreikam ksna sa nang kham bun ha thaiñ sor. Kane ka rai kan pynheh ïa ka jaka jong ka Phulwarisharif da 16.51 square km katba ka Danapur kan long 23.14 square km bad ka Khagaul kan long 9.4 square km.
Sa ha kawei pat ka rai kaba kongsan, ki khynnah kiba don ha ka rta kaba 03-06 snem ka rta kiba ïoh ïa ka jingpule ha Pre-school ha Anganwadi Kendras mynta kin ïoh ïa ka Uniform ba la pynkhreh da ka Jeevika, Bihar.
Ka kynhun Myntri ka la shim ïa ka rai ha kane ka bynta da kaba pynkylla ïa ka kyndon kaba la don lypa katkum ba la ai pisa T.400 na ka bynta uwei u khynnah ha ka shisnem sha ki Bank Account jong ki kmie ki kpa.
Yn sa ai ar phong ki sopti U niform ban pynbiang da ka Jeevika, Bihar ha Anganwadi Kendras, la ong ka ACS da kaba bynrap ba ka Jeevika kan ïoh ïa ka jingkiew manla u snem kaba san percent ha ka dor jong ka Uniform.
Ka kynhun Myntri ka la ai ïia ka jingmynjur ban aiti ïa ka jaka kaba san akar kaba don ha ka liang ba shaphang Shathie jong ka rudwah Ganga ha Mauja Dujra Diyara ha Patna ha ka jingaiwai ba shipor na ka bynta 25 snem sha ka Indian Inland Waterways Authority jong ka Ri India ban maramot ïa ki jhad bad ban shna ïa ka jaka sangeh jhad, la ong ka ACS.
Ka la mynjur ruh na ka bynta ka jingaiti ïa ka jaka kaba heh 25 akar sha ka tnad ka koit ka khiah na ka bynta ban tei ïa ka kolej bad hospital sorkar ha kawei ka jaka ha Amarpur Circle jong ka Banka distrik.
Ka kynhun Myntri ka la mynjur T.37.83 klur na ka bynta ban pynheh bad pynkhlaiñ ïa ka surok bypass kaba rim ka Sujata bypass kaba 2.45 km ha Gaya Ji distrik.
Ka la mynjur ruh ban tei ïa ka skul sah jong ki rit paid kaba don 560 jingthiah kawei kawei ha Brahmpur (Buxar) bad Chenari (Rohtas). Ka kynhun Myntri ka la mynjur ban ai pisa T.5 klur na ka bynta ban buh ïa ka Artificial Intelligence Centre ha kaba yn pyntreikam da ka jingïarap jong ka National Rural Development bad ka Panchayati Raj Institution kaba don ha Hyderabad.
Ka la mynjur ruh ïa ka Bihar State Bridge Management and Monitoring Rules 2025 na k abynta ban pynïaid bad ban pynbit pynbiang ïa ki jingkieng.
Ka kynhun Myntri ka la mang T.38.47 klur na ka bynta ban maramot ïa ka surok Kanwariya Path na Sultanganj shaduh Dumma ha Banka distrik na ka bynta san snem naduh u snem 2025 haduh u snem 2029.
Ïa kane ka Kanwariya Path la pyndonkam ha ka por ba don ka tamasa Shravani.
