Bengaluru, Jylliew:
Kiba bun ki juti bad ki sandal ki la saphriang sha kylleng sawdong bad don kumba katto-katne hangne-hangtai bad katto -katne ki jaiñ ki la satah ha kylleng ka jaka ha kaba kane ka la pyni ba kane ka dei na ka daw jong ka jingkhihwin kumba ka la jia ba ka dei na ka daw ka jingïaïuh para briew kaba la jia ha madan Chinnaswamy Stadium ha Bengaluru, ha kaba kane ka la shim ïa ka jingim jong 11 ngut ki briew bad pynmynsaw ïa 33 ngut kiwei pat.
Katba ka jingleh kmen ka dang sdang ban rakhe ïa ka jingjop nyngkong eh jong ka RCB ha ka IPL, ki paid bylleiñ ba kynthup ïa ki samla shynrang bad kynthei kiba la kot sha lak ngut, ki la ïalum lang tang shabar jong ka madan ïalehkai.
Kiba bun na ki samla ki la lah ban kiew ïa ki tnat dieng kiba heh bad ki samla kiba la kwah eh ban peit shapoh ka madan ïalehkai ki la kiew kat na ki jaka ba ki ïoh ban ksoh, don ruh kiba la kiew na ki kynroh khnang ba kin ïohlad ban rung shapoh ban ïohi ïa ki rang ïalehkai, baroh ha kajuh ka por.
Ym don lad shuh da kumwei pat ka ban lah ban pynsangeh ïa ki bad ki paidbah ki la nang bun bad ki jingpyrta ‘RCB’ ha ka jaka ba bun briew ki la ïarisa da ka jingkmen bad lehkmen ha kajuh ka por ha ki lynti synkien bad ki surok jong ka Bengaluru.
Katba ka jingkmen ka nang jur, ki paidbah ki la pynlynguh bad ïalum lymbrum ha kaba ym lah shuh ban tehlakam ïa ka jingïathyngian jong ki, ha kaba kane ka la wanrah ïa ka jingïaur bad ka jingïaïuh para briew. Ym slem hadien, la sdang ban sawa ki sur la ïahylla bad ïapyrta ha kaba na kane la sngewthuh ba la don jingjia ei ei, ki briew ki la ïakyllon ha madan, kim tip briew shuh, ha kaba ïa kiba bun na ki la pynkit noh sha ka jaka ai jingsumar.
Katba kine kiei kiei baroh ki dang jia, bun ki samla ki dang jied ban bteng ban shong ha ki kynroh jong ka Compound hajan ka iingmane bah Saint Mark bad haduh kane ka pat kim patiaw wat ïa ka jingbteng jong ka jingpynsawa ïa ka siren jong ki kali pulit khnang ban phah pynsngap jar ïa ki na ka jingïahylla bad ka jingïapyrta ban ai ka jingïaroh bad ka jingpynshlur ïa kine ki rangïalehkai jong ka kynhun ïalehkai kriket.
Ki pulit shynrang bad kynthei watla ki la leh katba lah ban pynbeit ïa ka jingbun briew hapoh bad sawdong jong ka jaka ïalehkai, hynrei ki la kham bun bha namar ka jingjop kaba nyngkong ka la kylla long ka jinglehkai kolshor jong ki samla. Ki jingkyrpad na ki pulit kiba pyntip ïa ki briew ba “ka madan ka la dap…ka madan ka la dap,” bad ka jingpynsngewthuh jong ki ka la long lehnohei naba ym shym la don ba patiaw.
Uwei napdeng ki nongsakhi u la ong, ba ki la don kumba 600-700 ngut ki briew khamtam ki kynthei ha ka por ba la lait kynsan ka jingkhang phalor ki la tur pyllup bad shah ïuh.
“La pynsaphriang ïa ka khubor jingtip ba la pynsangeh ïa ka Roadshow jong ka kynhun ïalehkai bad la khot ïa baroh ban ïalum lang ha madan ïalehkai, bad bun ki kynthei ki la wan khlem kano kano ka tiket…..ki pulit ki la pyrshang ban khanglad ïa ki kynthei, hynrei kim shym la sngap bad ki la pyrshang ban kiew ïa ki khyrdop. Kumba 600-700 ki la ñiat ïa ka jingkhang phalor bad ha kane ka por ki la pyrshang ban rung jubor shapoh. Kiba bun na ki lanot ha kane ka jingjia ki dei ki kynthei, watla nga la pyrshang ban ïarap, ngam shym la lah namar ka jingbun briew bad ka jingkulmar,” u la ong.
Sa uwei pat u nongsakhi u la ong ba ki briew ki la sdang ban ïalum wat lada la buh jingmaham ïa ki, da kito kiba don shakhmat jong ki. La dei ban ym don pulit, baroh ka la long da ka jingleh da ka bor. “Nga la ïohi ba bun ki khynnah kynthei ki la ur, don kiba la hap halor jong nga. Nga la don jingmynsaw ha ki bynta jong ka krung jong nga. Sngewnguh ba kam shym la ong kano kano ka jingap jingma nga la shu pang met bad pang dohksah,” u la ong.
Shuh shuh sa uwei pat u nongsakhi halor ka jingjia, u la ong ba ki la don kumba 30-40 ngut ki briew ki ur ha kajuh ka por namar ka jingkhapngiah bad ka jingïathyngngian palat, hynrei kiba bun ki briew ki la wan na shadien. Ki la don lai haduh saw ngut ki briew kiba la ïap hashen hakhmat jong nga.
“Ha ka por 3 baje janmiet la bthah ïa ngi ban wan hangne ha ka khyrdop kaba 7, hynrei ym shym la shah ïano ïano ruh ban rung hapoh ka madan haduh ka por 5.20 janmiet. Ka la don ka jingplie kaba rit, kaei pat ka ban jia? 300-400 ngut ki la don hangta ha kane ka khyrdop …ka la long da ka jingleh da ka bor bad ka long ka bok kaba khraw ba nga dang im,” u la ong.
Uwei u briew ha ryngkat ka jingïam kthang uba la duhnoh ïala u khun uba dang pule Engineer, u la kynthoh pyrshah ïa ki bor ba dei khmih, u la ong, “Namar ka jingbymsuidñiew jong phi phi la shim ïa ka jingim jong u khun jong nga mynta ka sngi….ailad ïa nga ban rah ïa ka met jong u khun jong nga ryngkat bad nga mynta ka sngi. Nga la duh noh ïa u khun ba marwei jong nga, uba la 22 snem ka rta. Namar ka jingleh jong phi, u khun jong nga u la kylla long ka metïap ha kane ka surok mynta. U la wan sha kane ka jaka khlem da ïathuh ïa nga.”
