Bengaluru, Jylliew:
Ka seng BJP bad ka JDS ha kane ka sngi Thohdieng ki la dawa ïa ka jingiehnohkam jong u Myntri Rangbah ka Jylla u Siddaramaiah bad ïa u Symbud Myntri Rangbah u DK Shivakumar da kaba kynnoh ïa ki ba ki la long ka daw halor ka jingjia ba sngewsih ba la jia ha ka por ba la pynlong ïa ka jingrakhe ïa ka jingjop jong ka RCB ha Bengaluru.
Haba ai jingkren ha ka jingïalang bad ki nongthoh khubor, u Myntri ka sorkar pdeng bad u nongïalam ka seng JDS u HD Kumaraswamy, bad u Ppresident ka seng BJP ha ka jylla u BY Vijayendra bad u nongïalam ka liang pyrshah ha ka ïingdorbar thawaiñ u R Ashoka ki la kynnoh ba ki jingtohkit da ka CID, Majistor bad ka komishon ba la khlieh da u nongbishar ba la shongthait kan ym lah ban pynpaw ïa ka jingshisha.
U Kumaraswamy, u la kynnoh ba ka sorkar, kam shym la shimkhia ïa ki jingai jingmut ba la ai da ki pulit bad ha kajuh ka por, ka la sospon ïa ki san ngut ki heh ophisar. U la buh jingkylli ïa ka jingdonkam ban don lai tylli ki jingpynshisha. “Ka sorkar ka la hukum ban tohkit lai sien namar ba ka don ka jingkitkhlieh ha ka ïingbishar bahakhliehduh,” u la ong.
Halor ka jingshah wengkam shipor jong ki heh pulit, u Kumaraswamy u la ong ba ka dei tang ka jingpynshitom na ka bynta shipor. Yn pynrung biang ïa ki ha ka kam hadien katto katne por.
U Myntri Rangbah bad u Symbud Myntri Rangbah ki la long ki nongbah khlieh halor kane ka jingjia basngewsih. Ka jingkwah bor bad ka jingpynbna paidbah jong ki ka la pynlong bad wanrah ïa ka jingjia ba sngewsih, u la kynnoh.
U Kumaraswamy u la dawa na ki heh nongïalam jong ka Congress ban sloit noh ïa u Siddaramaiah bad ïa u Shivakumar.
“Baroh arngut ki hap ban siewkylliang ïa ka jingjia ba sngewsih,” u la ong da kaba bynrap ba ka jinglehkmen halor ka jingjop jong ka sorkar ha Vidhana Soudha ka janlong kum ka kam ïing jong baroh arngut kine ki nongïalam.
U Vijayendra u la ong ba ka sorkar mynta ka la pynngat ïa ka RCB, ka KSCA bad kawei ka kompeni pynïaid ïa ki jingïalehkai kum kiba shah kynnoh ha ka mukotduma. Hynrei ha ka jingshisha u Myntri Rangbah, u Symbud Myntri Rangbah bad u Myntri ka tnat ki kam pohïing ki dei kiba shah kynnoh donkti kum ki nongshah kynnoh banyngkong, ba-ar bad balai.
“Haba ka kompeni pynïaid ïa ki jingïalehkai ka leit sha ki pulit jong ka Cubbon Park ban pan jingbit na ka bynta ki jinglehkmen ha Chinnaswamy Stadium, ki la kyntait bad ka dei ha ka kot. Te balei u Shivakumar u leit sha madan? Ïa kane hap ban jubab. U Myntri Rangbah, u Symbud Myntri Rangbah bad u Myntri ka tnat ki kam pohïing ki dei ban iehnoh kam ha ka rukom kaba dei,” u la ong.
U Ashoka u la ong ba balei ym shym la pynjari ïa ka kyndon 144 ha kylleng ki jaka ïalehkai haba ka sorkar ka tip ba bun ki briew kin leit sha katei ka jaka. Ka sorkar kan tep ïa kane ka mukotduma kumba ka la leh ha kaba ïadei bad ki kam thok ka MUDA bad ka Valmiki Corporation. “Da kaba ka sorkar ka dei ka nongshah kynnoh, kam lah ban hukum ban tohkit da ki bor synshar jong ka. Tang u nongbishar ba treikam ne ka kynhun CBI kiba lah ban tohkit ïa ka mukotduma,” u la ong.
